بھٹکل 21 مئی (ایس او نیوز)   بھٹکل میں چار سالہ لڑکا نالے میں بہہ کر جاں بحق ہونے کی واردات بھٹکل تعلقہ کے شرالی میں جمعہ کو پیش آئی ہے۔ مگر یہ معاملہ آج شام سنیچر کو سامنے آیا ہے۔

بتایا گیا ہے جمعہ کو موسلادھار بارش کے دوران جہاں سڑکیں اور کھیت تالاب کا منظر پیش کررہے تھے، پڈو شرالی میں بھی کھیتوں میں پانی بھرا ہوا تھا جو قریبی نالے سے بہہ رہاتھا۔ متعلقہ لڑکے کے گھر کے سامنے سے گزرنے والے اسی نالے میں لڑکا گرگیا اور گرتے ہی بارش کا پانی اسے تیزی کے ساتھ اپنے ساتھ بہا لے گیا۔

ذرائع نے بتایا کہ چار سالہ معصوم لڑکا وجیت گنپتی نائک جمعہ کی دوپہر انگن واڑی اسکول سے گھر لوٹا تھا، غالباََ نالے کے قریب ہی کھیلنے کے دوران نالے میں گرگیا۔

پتہ چلا ہے کہ اس کی ماں جو گھر کے اندر کاموں میں مصروف تھی۔ لڑکا پانی میں گرتے ہی  باہر دوڑتی ہوئی آئی اس وقت تک لڑکا پانی میں بہتا ہوا آگے نکل رہا تھا۔ ماں نے فوری طور پر لڑکے کو نالے سے باہر نکالامگر بتایا گیا ہے کہ لڑکا بہت زیادہ پانی پی چکا تھا۔ لڑکے کو جب شرالی اسپتال لے جایا گیا تو اس وقت تک لڑکے کی روح قبض ہوچکی تھی۔ انا للہ واناالیہ راجعون۔ 

لڑکے کے والد گنپتی کرشنا نائک نے اس تعلق سے مرڈیشور پولس تھانہ میں معاملہ درج کیا ہے، پولس مزید چھان بین کررہی ہے۔