بھٹکل 13/ستمبر (ایس او نیوز)  ایک پاگل کتے کے حملے میں بھٹکل میں چار مزید لوگ زخمی ہونے کی واردات آج جمعرات شام ریلوے اسٹیشن روڈ پر پیش آئی ہے جس میں ایک دس سالہ بچہ بھی شامل ہے۔

سمجھا جارہا ہے کہ چاروں لوگوں کو ایک ہی پاگل کتے نے حملہ کرکے کاٹا ہے،  چاروں لوگوں کو بھٹکل سرکاری اسپتال میں ضروری انجکشن اور دوائیوں کے بعد گھر جانے کی اجازت دی گئی ہے۔

زخمیوں کی شناخت اُم سلمیٰ  (31)، شبانہ (27)، شبیر (49) اور دس سالہ ریاّن کی حیثیت سے کی گئی ہے۔

خیال رہے کہ دو روز قبل ہی ایک پاگل کتے کے کاٹنے سے قریبی علاقہ مُٹھلی  کے چار لوگ زخمی ہوئے تھے، اب پھر ایک بار چار لوگ کتے کے حملے میں زخمی ہوئے ہیں۔

بھٹکل کے ہر علاقہ میں پچاسوں کتے ایک جگہ سے دوسری  جگہ بھاگتے نظر آتے ہیں، جس کے نتیجے میں کئی لوگ اپنی بائک سے گر کر بھی زخمی ہوئے ہیں، مگر ان کتوں پر کوئی لگام نہیں کسی جارہی ہے۔