شراڈی گھاٹ کے چورخی شاہراہ کاکام جلد مکمل کیا جائے، وزیراعلیٰ بسواراج بومئی کی مرکزی وزیر نتن گڈگری سے گزارش
بنگلورو،10؍ستمبر(ایس او نیوز) ریاستی وزیراعلیٰ بسواراج بومئی نے مرکزی وزیربرائے قومی شاہراہ وسرفیس ٹرانسپورٹ نتن گڈکری سے گزارش کی کہ شراڈی گھاٹ کے چورخی سڑک کے تعمیری کاموں کو تیز رفتاری کے ساتھ مکمل کیا جائے -دہلی میں گڈگری سے ملاقات کرکے یادداشت پیش کرنے کے بعد اخباری نمائندوں کو بومئی نے بتایا کہ شراڈی گھاٹ میں چورخی شاہراہ کے کاموں کو جلد از جلد شروع کرکے ترجیحی بنیاد پر مکمل کرنے کا مطالبہ کیا گیا ہے -انہوں نے بتایا کہ سرنگ کی تعمیرکے سلسلہ میں متعلقہ حکام کے ساتھ بات چیت کی گئی ہے اس کے علاوہ ریاست کے 4شاہراہوں کو قومی شاہراہ کے طور پر ترقی دینے کی پیشکش کی گئی ہے -انہوں نے بتایا کہ حکومت کرناٹک نے زمین پر قبضہ جات کیلئے ہونے والے 1,560 کروڑ روپیوں میں سے 30 فیصد برداشت کرنے رضامندی کا اظہار کیا ہے جس کے پیش نظر اسکیم شروع کرنے کا مطالبہ کیا گیا ہے -انہوں نے بتایا کہ ریاست میں سیلاب اورزمین کھسکنے کے واقعات سے قومی شاہراہوں کو بھاری نقصان پہنچا ہے ان کی مرمت کیلئے 184.85 کروڑ روپئے جاری کرنے کا مطالبہ کیا گیا ہے -انہوں نے بتایا کہ وجئے پور-سنگیشور قومی شاہراہ میں 0تا80 کلو میٹر سڑک کی ترقی کام جاری ہے اورگڈکری نے 80 کلو میٹرتا 168.90 کلو میٹر کی ترقی کے لئے منظوری دی ہے اور ریاستی شاہراہوں کو قومی شاہراہ کے طورپر اعلان کرنے کا مطالبہ کیا گیا ہے -اس موقع پر محکمہ تعمیرات عامہ کے وزیرسی سی پاٹل، محکمہ محصولات کے وزیر آراشوک ودیگر حاضر رہے -