نئی دہلی،12؍اگست (ایس او نیوز؍ایجنسی) سابق صدر جمہوریہ پرنب مکھرجی کے دماغ کے آپریشن کے بعد حالت بگڑ گئی ہے۔ وہ دہلی کے فوجی اسپتال میں زیر علاج ہیں جہاں انہیں وینٹی لیٹر پر رکھا گیا ہے۔ 84؍ سالہ پرنب مکھرجی کو دماغ میں پڑ جانے والی گانٹھ کے آپریشن کیلئے پیر کی دوپہر اسپتال داخل کیا گیا تھا۔ یہاں ان کی کووڈ-19 رپورٹ بھی مثبت آئی تھی جس کی اطلاع ان کے ہی ٹویٹر ہینڈل سے پیر کو دی گئی تھی۔
منگل کو پرنب مکھرجی کی صحت کے تعلق سے جاری کئے گئے بلیٹن میں آرمیز ریسرچ اینڈ ریفرل اسپتال نے کہا ہے کہ ’’دہلی کے فوجی اسپتال میں پرنب مکھرجی کی حالت مسلسل نازک بنی ہوئی ہے، سابق صدر جن کی جان بچانے کیلئے ۱۰؍ اگست کو دماغ میں سُدے کا آپریشن کیاگیا ہے،کی صحت میں کوئی بہتری نظر نہیں آرہی ہےبلکہ حالت بگڑتی جارہی ہے۔ انہیں وینٹی لیٹر کی مدد فراہم کی گئی ہے۔‘‘اسپتال کے مطابق پیر کو جب انہیں اسپتال داخل کیاگیاتھا تب بھی ان کی حالت نازک تھی۔ اسپتال کے مطابق پیر کو جب جانچ میں یہ پتہ چلا کہ ان کے دماغ میں بڑی سی گانٹھ ہے تواسے نکالنے کےلئے فوری طور پر آپریشن کیاگیا۔