کمٹہ - ہوناور حلقہ کے سابق رکن اسمبلی ڈاکٹرایم پی کرکی انتقال کر گئے
ہوناور 19/ اکتوبر (ایس او نیوز) ہوناور حلقہ سے دو مرتبہ رکن اسمبلی منتخب ہونے اور فی الحال ایس ڈی ایم کالج کے صدر کے بطور خدمات انجام دے رہے ڈاکٹرایم پی کرکی (89 سال) انتقال کر گئے۔ ڈاکٹر کرکی بی جے پی بننے سے قبل جن سنگھ کے رکن تھے اور بی جے پی تشکیل پانے کے بعد اس کے مشکل ترین دور میں وہ 18 سال تک پارٹی کے ضلع صدر رہے ۔ ایک مرتبہ ریاستی سیکریٹری کے طور پر بھی انہوں نے خدمات انجام دی ہیں ۔
سال 1983 اور 1994 میں وہ کمٹہ ہوناور حلقہ سے رکن اسمبلی منتخب ہوئے ۔ انہیں ایس ڈی کالج ذمہ دار کے بطور 40 سال تک تعلیمی میدان میں خدمات انجام دینے کا اعزاز حاصل رہا ہے ۔
ڈاکٹر کرکی کے انتقال پر رکن اسمبلی دینکر شیٹی، سنیل نائک ، بی جے پی تعلقہ صدر راجیش بھنڈاری، پٹن پنچایت صدر شیورام میستا اور دیگر شخصیات نے اپنے دکھ کا اظہار کرتے ہوئے ان کے اہل خانہ کے ساتھ ہمدردی جتائی ہے ۔