کوروناکے سبب سابق وزیر کرناٹک کے بی شان اپا کا انتقال
گلبرگہ، 10/مئی(ایس او نیوز/شاکر ایم اے حکیم)سابق وزیر کرناٹک و سابق رکن راجیہ سبھا و رکن قانون ساز کونسل کملار بھیمشاناپا (کے بی شان اپا) کا کورونا کے سبب انتقال ہوگیا۔ وہ گزشتہ چار دنوں سے گلبرگہ شہر کے جمس ہاسپٹل میں زیر علاج تھے۔اتوار کے دن شام چار بجے ان کا انتقال ہوگیا۔
16مئی 1938انکی تاریخ پیدائش تھی اور وہ 84برس کے تھے۔ ان کاتعلق پیشہء تدریس سے تھے لیکن عوام کی خدمت کے مقصد سے وہ سیاست میں داخل ہوئے تھے۔ وہ ہر کسی سے نہایت خوش اخلاقی کے ساتھ اور نرمی کے ساتھ پیش آتے تھے۔ ان کے پسماندگان میں دو فرزندان اور دو دختران شامل ہیں۔
حلقہ اسمبلی شاہ آباد سے وہ دو بار بطور رکن اسمبلی اور ایک بار بحیثیت رکن راجیہ سبھا کے علاوہ سابق شیف منسٹرجے ایچ پاٹل کے دور وزارت میں وہ بحیثیت وزیر آبکاری خدمات انجام دے چکے ہیں۔ سال 2012 میں بی جے پی کے سرگرم رکن کی حیثیت سے بھی انھوں نے خدمات انجام دی تھیں لیکن گزشتہ پارلیمانی انتخابات میں وہ بی جے پی کو چھوڑ کرممتاز کانگریسی قائد ڈاکٹر ملیکارجن کھرگے کی تائید میں کانگریس میں شامل ہوگئے تھے۔