آئی این ایل ڈی کے سابق ممبر اسمبلی راؤ بہادر نے تھاما کانگریس کا دامن، دپیندر ہڈا کی نامزدگی میں ہوں گے شامل
بھیوانی: 21 /اپریل(ایس اونیوز /آئی این ایس انڈیا)جنوبی ہریانہ کے قدآور لیڈر اور انیلو کے سابق ممبر اسمبلی راؤ بہادر سنگھ نے اتوار کو کانگریس پارٹی کا دامن تھام لیا۔راؤ بہادر سنگھ نے آج بتایا کہ 22 اپریل کو روہتک میں ایم پی دپیندر ہڈا کی نامزدگی کے موقع پر وہ اپنے 5000 حامیوں کے ساتھ موجود رہیں گے۔کانگریس صدر راہل گاندھی اور بھوپندر سنگھ ہڈا کی قیادت میں یقین ظاہر کرتے ہوئے انہوں نے کہا کہ کانگریس پارٹی ہی واحد ایسی پارٹی ہے جو معاشرے کے تمام طبقات کو ساتھ لے کر ہمہ جہتی ترقی کی پالیسی پر چلتی ہے اور انہی پالیسیوں اور قیادت سے متاثر ہو کر انہوں نے کانگریس پارٹی میں شامل ہونے کا فیصلہ کیا ہے۔راؤ بہادر سنگھ سال 2009 میں نانگل چودھری اسمبلی سے ممبر اسمبلی بنے تھے۔2014 میں وہ بھیوانی مہندرگڑھ سے انیلو کے لوک سبھا امیدوار بھی رہے۔اس انتخاب میں انہیں 275168 ووٹ ملے اور وہ دوسرے نمبر پر رہے۔انہوں نے کہا کہ بی جے پی نے جھوٹے وعدے کرکے ملک اور ریاست میں اقتدار حاصل کیا اور 5 سال گزرنے کے باوجود ایک بھی وعدہ پورا نہیں کیا، بلکہ بی جے پی کے عوام مخالف فیصلوں کی وجہ سے سماج کا ہر طبقہ ناراض ہے۔