بنگلورو، 17؍دسمبر (ایس او نیوز)یلا پور کے سابق رکن اسمبلی،بھارتیہ جنتا پارٹی (بی جے پی) کے وی این پاٹل اور بی جے پی کے ایک اور لیڈر سرینواس بھٹ نے جمعرات کے روز کے کرناٹک پردیش کانگریس کمیٹی (کے پی سی سی)صدر ڈی کے شیو کمار اور سابق وزیر اعلیٰ سدارامیا کی موجودگی میں کانگریس پارٹی میں شمولیت اختیار کرلی۔

کے پی سی سی دفتر میں ایک اخباری کانفرنس کے دوران ان دونوں رہنماؤں کو پارٹی کا پرچم دے کر قائدین نے کانگریس میں خیرمقدم کیا۔ شیو کمار نے کہا کہ وی این پاٹل نے ہمارے ساتھ اسمبلی میں کام کیا ہے۔ جس وقت صدر ہند ڈاکٹر اے پی جے عبدالکلام نے مشترکہ ایوان سے خطاب کیا تھا اس وقت پاٹل کو بہترین رکن اسمبلی کا اعزاز دیا گیا۔ انہوں نے کہا کہ پاٹل کے والد بلاک کانگریس صدر رہ چکے ہیں اور پاٹل بھی کافی عرصے تک کانگریس سے وابستہ رہے بعد میں بی جے پی میں شامل ہو گئے تھے۔

انہوں نے کہا کہ آپریشن کمل کے ذریعے کانگریس چھوڑ کر بی جے پی میں شامل ہوئے اراکین اسمبلی اور وزراء کے حلقوں میں بڑی تعداد میں کارکن کانگریس میں لوٹ رہے ہیں۔ شیو کمار نے کہا کہ دو اور بی جے پی قائدین آج کانگریس میں شامل ہونے والے تھے لیکن ان کی صحت خراب ہونے کے سبب شمولیت کا پروگرم ملتوی کر دیا گیا ہے۔ آنے والے دنوں میں ہر اسمبلی سے ایک ایک رہنما کو کانگریس میں شامل کر لیا جائے گا۔