بنگلور،07/نومبر(آئی این ایس انڈیا) کرناٹک پریمیئر لیگ (کے پی ایل) میں اسپاٹ فکسنگ کے لئے مبینہ طور پر پیسے لینے کے الزام میں رنجی ٹرافی اور آئی پی ایل کرکٹر سی ایم گوتم اور  ان کے سابق ساتھی کھلاڑی ابرار قاضی کو گرفتار کیا گیا ہے بیلاری ٹسکرس کے کپتان اور کرناٹک کے سابق وکٹ کیپر بلے باز گوتم اور ان کے ساتھی کھلاڑی قاضی کو کرائم برانچ نے گرفتار کیا جو کے پی ایل کے گزشتہ دو سیشن میں اسپاٹ فکسنگ کی تحقیقات کر رہی ہے۔

پولیس کمشنر سندیپ پاٹل نے کہا کہ ہم نے کے پی ایل فکسنگ معاملے میں دو اور افراد کو گرفتار کیا ہے۔ پولیس نے بتایا کہ دونوں ہبلی بمقابلہ بلاری فائنل میچ میں فکسنگ میں ملوث پائے گئے تھے۔ ہبلی نے وہ میچ آٹھ رنز سے جیتا تھا۔ان کوسست بلے بازی کے لیے 20 لاکھ روپے دیئے گئے تھے۔بنگلور ٹیم کے خلاف ایک اور میچ فکس کیا تھا۔ گوتم اس سیشن میں گوا ٹیم میں اور قاضی میزورم رنجی ٹیم میں شامل تھے۔کرناٹک اور گوا کے لئے رنجی ٹرافی کھیلنے کے علاوہ گوتم نے آرسی بی، ممبئی انڈینس اور دہلی ڈیر ڈیولس کے لئے آئی پی ایل بھی کھیلا۔وہ 94 فرسٹ کلاس میچ کھیل چکے ہیں اور کرناٹک ٹیم کے رکن رہے۔اس سال وہ گوا ٹیم میں شامل ہوئے تھے۔دونوں جمعہ سے شروع ہو رہی سید مشتاق علی ٹرافی ٹورنامنٹ کے لیے اپنے پردیش کی ٹیم کا حصہ ہیں۔اس سے پہلے بنگلور ٹیم کے کھلاڑی نشانت سنگھ شیخاوت کو بھی اس ہفتے گرفتار کیا گیا تھا۔گرفتار کئے گئے تین دیگر افراد میں بیلاگاوی پینتھرس کے مالک بھی شامل ہے۔بنگلور بلاسٹرکے بولنگ کوچ وینو پرساد اور بلے باز وشوناتھن کو بھی اس معاملے میں گرفتار کیا گیا ہے۔