کرناٹک میں دوبارہ لاک ڈاؤن کرنا ہی بہتر: سابق وزیر اعلیٰ کمار سوامی
بنگلورو ،16؍ مارچ (ایس او نیوز ) کرناٹک میں دن بدن کورونا وائرس کے معاملات میں اضا فہ کو دیکھتے ہوئے سابق وزیر اعلی ایچ ڈی کمارسوامی نے ریاستی حکومت کو مشورہ دیا ہے کہ ایک بار پھر حالات کو قابو میں کرنے کے لئے الگ ڈاؤن کا آغاز کردیا جائے ۔
اخباری نمائندوں سے بات کرتے ہوئے انہوں نے کہا کہ ریاست کرناٹک بالخصوص شہر بنگلورو میں کورونا متاثرین کی تعداد میں اضافہ ہوتا جارہا ہے اس کے پیش نظر کرناٹک میں کچھ دنوں کے لئے ایک لاک ڈاؤن کردینا مناسب ہو گا ۔ انہوں نے کہا کہ جس وقت کو رونا وائرس کے واقعات کو قابو میں کر لیا گیا تھا تب بھی ریاست بھر میں کور و نا وائرس کے معاملات روزانہ 200 تا 300 تک سامنے آرہے تھے۔ اب متاثرین کی تعداد1000 کے آس پاس ہوتی جارہی ہے ایسے میں لاک ڈاؤن کر دینا ہی بہتر تدبیر ہوگی ۔
انہوں نے کہا کہ آنے والے دنوں میں کو رونا وائرس کے حالات میں اور بھی خرابی کے آثار نمایاں نظر آ رہے ہیں ایسے میں ممکن ہے کہ لاک ڈاؤن کرنے کی صورتحال پیدا ہو جائے اس کے لئے حکومت کو پوری طرح تیار رہنا چاہئے ۔ انہوں نے کہا کہ لوگوں کو سماجی فاصلہ بر تنا ہو گا ، احتیاطی تدبیر اپنانی ہو گی اور ساتھ ہی ماسک کا پابندی سے استعمال کرنا ہوگا ۔ عوامی مقامات پر زیادہ لوگ جمع نہ ہونے پائیں یقینی بنانا ہوگا۔