بھٹکل انجمن ہائی اسکول کے سابق استاد محمد زُبیر چمپا انتقال کرگئے
بھٹکل 8 مئی (ایس او نیوز/سید ابوبکر مالکی)ا نجمن ہائی اسکول کے سابق استاد اور سب کے ہردل عزیز جناب محمد زبیر چمپا صاحب جمعرات 6 مئی کو بھٹکل مدینہ کالونی میں واقع اپنی قیام گاہ پر انتقال کرگئے۔ انا للہ و انا الیہ راجعون۔ ان کی عمر 78 سال تھی۔ رات قریب گیارہ بجے نوائط کالونی قبرستان میں تدفین عمل میں آئی۔
مرحوم اہم خوبیوں اور صفات کے مالک تھے۔ بچپن میں مرحوم ہیڈ ماسٹر عثمان حسن جوباپو کا دست شفقت ان کے سر پر رہا ۔ انجمن ہائی اسکول میں معمولی سی ملازمت کے ساتھ اپنی پیشہ وارانہ زندگی کا اغاز کیا ۔ اس دوران انہوں نے میٹرک کا امتحان پاس کیا اور درس و تدریس کے شعبہ سے وابستہ ہو گئے۔ ہمیشہ چاق و چوبند رہتے تھے۔ انہیں کھیلوں اور ورزش میں زیادہ دلچسپی تھی اس لئے پی ٹی کا کورس بھی کیا ۔ اسکول کی سوشیل گیدرنگ اور کھیلوں میں ان کی اناونسنگ انجمن کی تاریخ کا ایک حصہ ہے ۔ انہوں نے بہت سارے پروگراموں کی نظامت کی اور وہ اس فن کے ماہر تھے ۔ آپ نے تقریبا بیس سال تک انجمن ہائی اسکول میں پی ٹی ماسٹر اور NCC آفیسر کے طور پر خدمت انجام دی۔
بھٹکل میں جب انجمن کالج شروع ہوا تو پہلے بیچ سے فارغ ہونے والے 6 مسلم طالب علموں میں آپ کا بھی شمار ہوتا ہے ۔ پھر اپنی معاشی ترقی کے پیش نظر مرحوم نے دبئی کا رخ کیا ۔ ان کی زندگی میں کافی اتار چڑھاو آئے مگر انہوں نے کبھی حوصلہ نہیں ہارا ۔ ان کی زندگی تمام لوگوں کے لئے ایک رول ماڈل ہے ۔ کڑی محنت سے انہوں نے اپنی زندگی کو سنوارا۔ وہ ایک self made man تھے ۔ دبئی میں کسٹم کے شعبہ سے کافی عرصہ تک منسلک رہے ۔ایک اندازے کے مطابق تقریباً تیس سال تک مرحوم دبئی میں زیر معاش رہے ۔ ان کا رشتہ ہمیشہ قلم اور کاغذ سے رہا ۔ آپ نے دو کتابیں تحریر فرمائیں پہلی سرمایہ معلومات اور دوسری اُمنگ ۔ ان کتابوں کا اجرا دبئی جماعت کی زیر نگرانی ایک مشاعرے کی شکل میں ہوا ۔
دبئی کو خیر باد کہنے کے بعد بھٹکل میں آپ مسجد عثمانیہ سے منسلک رہے،آپ ذاتی اعتبارسے بہترین اخلاق وکردار کے مالک تھے، صوم وصلاة کے نہ صرف پابند بلکہ تکبیر اولی اور پہلی صف میں رہتے تھے، بچوں کی ہمیشہ ہی حوصلہ افزائی فرماتے تھےاور ان کی کتابوں کا موضوغ بھی یہی تھا۔آپ کے پسماندگان میں اہلیہ، دو فرزند اور تین دختر ہیں۔
اللہ مرحوم کو اپنے جوار رحمت میں جگہ دے اور پسماندگان کو صبر جمیل عطا فرمائے۔ قبر و برزخ کے مراحل ان کے لئے آسان فرمائے۔ اپنے خصوصی فضل سے جنت میں ان کے درجات بلند کرے ۔ آمین
