بھٹکل: 9؍اکتوبر(ایس اؤ نیوز) فوریسٹ اتی کرم داروں کے مسائل کی طرف توجہ دیتے ہوئے انہیں حل کرنے اور اتی کرم داروں پر ہورہے ظلم و ہراسانی پر روک لگانے کا مطالبہ لےکرکل  10ستمبر بروز جمعرات کی صبح 10بجے فوریسٹ اتی کرم داروں کی بہت بڑے پیمانے پر احتجاجی ریلی منعقد کی جارہی ہے جسے بھٹکل کے قومی سماجی ادارہ مجلس اصلاح و تنظیم کی بھی مکمل حمایت حاصل ہے۔   اس بات کی اطلاع اُترکنڑا  ضلع فوریسٹ اتی کرم دار ویدیکے کے صدر اے رویندر نائک نے دی ہے۔

پریس ریلیز جار ی کرتےہوئے منتظمین کی طرف سے کہاگیا ہے کہ بھٹکل کرکٹ اکیڈمی کے صحن ( ہوٹل وائی بھاو کے پیچھے )سے صبح 10بجے ریلی نکلے گی۔ انہوں  نےکہا کہ بھٹکل تعلقہ کے دیہاتوں کو شراوتی جنگلات میں شامل کیا گیا ہے، جسے  نکالنے کا مطالبہ کیا جائے گا ساتھ ساتھ  فوریسٹ افسران کی جانب سے فوریسٹ اتی کرم داروں پر ہونے والے ظلم و ہراسانی پرروک لگانے کا بھی پُرزور مطالبہ ہوگا۔

رویندر نائک نے بتایا کہ ہمارے مطالبات پر توجہ دینے کے لئے ہم نے راست چیف فوریسٹ آفیسر کو تحریری خط لکھا ہے، انہی کی موجودگی میں فوریسٹ افسران اور عملے کی طرف سے ہونےو الی قانونی خلاف ورزیاں اور فوریسٹ اتی کرم داروں پرہورہی ناانصافی، ظلم، ہراسانی کے متعلق کارروائی کی مانگ کی جائے گی۔

اس تعلق سے بھٹکل کا سب سے بڑا  قومی سماجی ادارہ  مجلس اصلاح وتنظیم  نے بھی  اس احتجاج کو مکمل حمایت کرنے کا اعلان کیا ہے۔ تنظیم کے جنرل سکریٹری عبدالرقیب ایم جے ندوی نے  عوام الناس سے درخواست کی ہے کہ اس احتجاج میں کثیر تعداد میں شریک ہوکر آتی کرم داروں کے خلاف ہونے والےظلم  وہراسانی   کو روکنے اپنی آواز بلند کریں۔