بنگلورو،15؍اگست (ایس او نیوز؍ایجنسی) بینگلور کے چامراج پیٹ عیدگاہ میدان میں وقف بورڈ اورکرناٹک ریونیو ڈپارٹمنٹ کے بیج جاری تنازعہ کے دوران آج 15 اگست کو یوم آزادی کے موقع پر ترنگا جھنڈا لہرایا گیا۔اس موقع پر ریپیڈ ایکشن فورس (RAF)، سٹی آرمڈ ریزرو (CAR)، اور کرناٹک اسٹیٹ ریزرو پولیس (KSRP) کی طرف سے سخت سیکورٹی کے انتظامات کئے گئےتھے۔
عیدگاہ میدان کے مالکانہ حقوق اور قومی پرچم لہرانے کے بارے میں ایک بڑے تنازعہ کے بعد، محکمہ ریونیو نے اعلان کیا تھا کہ اُن کی طرف سے ترنگا جھنڈا لہرایا جائے گا، پھر بعد میں محکمہ ریونیو نے عیدگاہ میدان پر اپنی ملکیت کا بھی دعویٰ کیا تھا، جس پر کرناٹک اسٹیٹ بورڈ آف اوقاف نے کرناٹک وقف ٹربیونل میں چیلنج کیا ہے اور ٹریبونل سے گزارش کی ہے کہ بی بی ایم پی کے ایک ذیلی افسر کی طرف سے جاری اس حکم نامہ کو کالعدم قرار دیا جائے ۔ اس موقع پر وقف بورڈ کے چیرمین شافع سعدی نے کہا تھا کہ وقف بورڈ اس معاملہ میں بی بی ایم پی کے خلاف سپریم کورٹ میں توہین عدالت کا کیس درج کرنے کے ساتھ ساتھ ہائی کورٹ میں بی بی ایم پی کے تازہ حکم کے خلاف رٹ عرضی دائر کر نے کی تیاری کر رہا ہے۔
اس بیج یوم آزادی کے امرت مہوتسو کے موقع پر عیدگاہ میدان میں پہلی بار قومی ترنگا لہرایا گیا، اسسٹنٹ کمشنر ایم جی شیونّا نے پرچم کشائی کی ،پروگرام میں ممبر آف پارلیمنٹ پی پی سی موہن، ایم ایل اے بی زیڈ ضمیر احمد خان، اے سی پی سندیپ پاٹل اور ڈی سی پی لکشمن بی نمبرگی کے علاوہ دیگر ذمہ داران بھی موجود تھے۔ چامراج پیٹ کے کئی اسکولوں کی جانب سے مشترکہ طور پر ایک ثقافتی پروگرام کا انعقاد بھی کیا گیا تھا جس میں بچوں نے آزادی پسندوں کے خاکے پیش کیے اور حب الوطنی کے گیت گاتے ہوئے رقص بھی کیا۔
اس موقع پر خطاب کرتے ہوئے کانگریس لیڈر اور چامراج پیٹ کے رکن اسمبلی بی زیڈ ضمیر احمد خان نے کہا کہ ’’ہمیں بہت خوشی ہے کہ آج اس گراؤنڈ پر پرچم کشائی کی گئی ہے۔ ہم نے دوماہ قبل ہی عیدگاہ میدان میں جھنڈا لہرانے کا اعلان کیا تھا۔