اڈپی میں کوارنٹین کی خلاف ورزی کرنے والوں پر کارروائی کرنے کے لئے ڈپٹی کمشنر نے تشکیل دیا ’فلائنگ اسکواڈ‘
اڈپی،9؍جون (ایس او نیوز) لاک ڈاؤن قوانین میں چھوٹ دینے اور بیرون ریاست سے خصوصی ٹرینیں شروع کرنے کے بعد اڈپی ضلع میں باہر سے آنے والوں کی تعداد میں زبردست اضافہ دیکھنے کو ملا ہے۔حکومت کی طرف سے یہ ہدایات بھی جار ی ہوئی ہیں کہ بیرون ریاست اور بیرون اضلاع اور بیرونی ممالک سے واپس لوٹنے والوں کو کوارنٹین کیا جائے۔
مگر دیکھا گیا ہے کہ بہت سارے افراد کوارنٹین قوانین کی پابندی نہیں کررہے ہیں اور یہاں وہاں گھومتے نظر آرہے ہیں۔ اس صورت حال پر قابو پانے کے لئے ڈپٹی کمشنر جی جگدیش نے ’فلائنگ اسکواڈ‘ تشکیل دیا ہے، جو خلاف ورزی کرنے والوں پر نظر رکھے گا اور ان کے خلاف کارروائی کرتے ہوئے ایف آئی آر درج کرنے کا کام کرے گا۔فلائنگ اسکواڈ میں شامل افسران بالکل اسی طرح اپنی ذمہ داریاں انجام دیں گے جس طرح الیکشن کے زمانے میں انجام دی جاتی ہیں۔یہ افسران ہوم کوارنٹین کیے گئے لوگوں کے گھر پر جائیں گے اور وہاں وقتاً فوقتاً جانچ پڑتا ل کی کارروائی انجام دیں گے۔اور جو لوگ گھروں سے باہر گھوم پھر رہے ہونگے ان کے خلاف ایف آئی آر درج کیے جائیں گے۔جن لوگوں کو سرکاری طور پر مقرر کیے گئے مراکز میں کوارنٹین کیا گیا ہے، وہاں پہنچ کر بھی فلائی اسکواڈ کا عملہ معائنہ کی کارروائی کرے گا۔ڈی سی نے شہری علاقے اور مضافاتی علاقے کے لئے الگ الگ اسکواڈ تشکیل دئے ہیں۔اسکواڈ کو پنچایت ڈیولپمنٹ آفیسر اور ولیج اکاؤنٹنٹ کے کام کاج پربھی نگرانی کرنے کے اختیار ات دئے گئے ہیں۔خیال رہے کہ پی ڈی او اور ولیج اکاؤنٹنٹ کو یہ ذمہ داری سونپی گئی ہے کہ کوارنٹین موبائل واچ نامی ایپ ڈاؤن لوڈ کرکے اپنے علاقے میں کوارنٹین کیے گئے لوگوں کے گھر پر جاکر اس کے گھر پر موجود ہونے کا فوٹو لینا اور ایپ میں اپ لوڈ کرنا ہے۔ اس طرح کوارنٹین کیے گئے افرادپر نظر بنائے رکھنا ہے۔