کرناٹک میں سیلاب کی صورت حال پر اڈوائزری جاری
بنگلورو،20؍اگست(ایس او نیوز؍یواین آئی)سنٹرل واٹر کمیشن(سی ڈبلیو سی)نے مہاراشٹر کے کچھ حصوں میں مسلسل بارش ہونے کے سبب کرناٹک کے کرشنا ندی سے متصل علاقوں میں سیلاب کی صورت حال مزید سنگین ہونے کے تعلق سے ایڈوائزری جاری کی ہے۔
سی ڈبلیو سی نے کہا کہ شدید بارش کے سبب آبی ذخائر میں پانی کی سطح میں مزید اضافہ ہوسکتا ہے۔اس نے کہا کہ وسطی مہاراشٹر میں شدید بارش ہونے کی پیش گوئی ہے جس کے سبب کرناٹک میں سیلاب کی صورت حال مزید سنگین ہوسکتی ہے۔
سی ڈبلیو سی نے اطلاع دی کہ وسطی مہاراشٹر میں اگلے چاردنوں تک بارش ہوسکتی ہے جس کی وجہ سے الماٹی ڈیم کے کرشنا بیسن میں پانی کی سطح میں اضافہ ہوسکتا ہے۔اس درمیان کرناٹک کے ضلع بگل کوٹے کے کئی گاؤں سیلاب کے پانی سے ڈوب گئے ہیں اور افسران نے دیہی باشندوں کو محفوظ مقام تک پہنچایا ہے۔بدھ کی صبح سات بجے کرناٹک-تلنگانہ سرحد پر جورالا کے نزدیک پریاپردرشنی باندھ کے قریب تین لاشیں برآمد ہوئیں۔حکام نے ابھی تک اس بات کی تصدیق نہیں کی ہے کہ کیا یہ لاش انہیں لوگوں کی ہیں جو پیر شام پیڈاکورم کے قریب کرشنا ندی میں ایک کشتی کے پلٹ جانے کے بعد لاپتہ ہوگئے تھے۔حادثہ کے وقت کشتی پر تقریباً 13 افراد سوار تھے۔پیر کی شام کشتی کرشنا ندی میں پلٹ جانے کے بعد ایک لڑکی سمیت چار لوگ لاپتہ ہوگئے تھے جبکہ دیگر مقامی افراد کی مدد سے محفوظ مقام پر پہنچ گئے تھے۔
