طوفان’بلبل‘کے قہر کے بعد کولکاتہ ایئرپورٹ پھر کھلا، 4 اضلاع میں ہوئی بھاری تباہی
کولکاتہ،10نومبر(ایس او نیوز/آئی این ایس انڈیا) خلیج بنگال میں بنے سمندری طوفان بلبل نے اتوار کی صبح پڑوسی ملک بنگلہ دیش کے ساتھ ہی ساتھ ہندوستان کی دو ریاستوں مغربی بنگال اور اڑیسہ کے ساحلی علاقوں پر بھی قہر برپایا۔کولکاتہ ایئرپورٹ کو احتیاطا 12 گھنٹے کے لئے بند کر دیا گیا تھا۔ایئرپورٹ کو ہفتے کی شام 6 بجے سے اتوار کی صبح 6 بجے تک بند رکھا گیا تھا۔ہفتہ آدھی رات طوفان بلبل کے 24 پرگنہ ضلع میں نشانہ بنانے کی وجہ سے اتوار کی صبح کولکاتہ ایئرپورٹ سے ہوائی جہاز آپریشن ایک بار پھر شروع ہو گیا۔اب تک اس سمندری طوفان کی وجہ سے ہندوستان میں تین لوگوں کی جان جا چکی ہے جبکہ ہزاروں لوگ بے گھر ہو چکے ہیں۔حاصل معلومات کے مطابق مغربی بنگال میں دو اور اڑیسہ میں ایک شخص کی موت ہوئی ہے۔مغربی بنگال کے چار اضلاع کی بات کریں تو اس سمندری طوفان بلبل کی وجہ سے جنوبی 24 پرگنہ، شمالی 24 پرگنہ، مشرقی مدناپور اور کولکاتہ میں کروڑوں کی پراپرٹی برباد ہو چکی ہے۔گزشتہ 24 گھنٹوں سے چل رہی تیز ہواؤں کی وجہ سے سینکڑوں درخت مکمل طور زمین دوز ہو چکے ہیں۔چند گھنٹوں میں 20 ملی میٹر سے زیادہ کی بارش ہو چکی ہے۔کولکاتہ اور اس کے ارد گرد کے علاقوں میں ٹریفک مکمل طور پررکنے کی وجہ سے لوگوں کو ایک عجیب سا ماحول دیکھنا پڑا۔اس دوران وزیر اعلی ممتا بنرجی نے بھی کنٹرول پینل کا دورہ کیا اور چیف سکریٹری راجیو سنہا کے ساتھ مکمل حالات کی نگرانی میں کئی گھنٹے گزارے۔بلبل کا اثر سب سے زیادہ سمندر جزائر پر پڑا جہاں تیز ہواؤں اور سمندری لہروں کی وجہ سے بہت سے گھر منہدم ہو گئے۔مقامی باشندوں کو سیلاب پناہ گاہوں سمیت محفوظ مقامات پر پہنچا دیا گیا ہے۔اس کے ساتھ ہی سرکاری حکام کی طرف سے ان کے کھانے پینے کی چیزیں بھی فراہم کی جاتی ہیں۔