یوم اساتذہ اور کاروار تعلیمی ضلع :پانچ پانچ بیسٹ ٹیچروں کی کی جائے گی تہنیت؛ بھٹکل کی ایک مسلم ٹیچر بھی بیسٹ ٹیچروں کی لسٹ میں شامل
بھٹکل 3 ستمبر (ایس او نیوز) 5 ستمبر کو یوم اساتذہ کے موقع پر کاروار تعلیمی ضلع کے لوور پرائمری کے پانچ بیسٹ ٹیچرس، ہائیر پرائمری کے پانچ اسی طرح ہائی اسکول کے پانچ بیسٹ ٹیچروں کو خصوصی ایوارڈ سے نوازا جائے گا اور اُن کی تعلیمی خدمات کے اعتراف میں تہنیت پیش کی جائے گی۔ 15 بیسٹ ٹیچروں کی اس لسٹ میں صرف ایک مسلم ٹیچر شامل ہے جس کا تعلق بھٹکل کے مرڈیشور ہائی اسکول سے ہے۔
اُترکنڑا کے محکمہ تعلیم کی جانب سے جاری کی گئی بیسٹ ٹیچروں کی اس لسٹ میں مرڈیشور کے نیشنل ہائی اسکول کی ہیڈ مسٹریس شاہین بدر کا نام بھی شامل ہے جنہیں بیسٹ ٹیچر کے اعزاز سے نواز جائے گا۔زیولوجی میں ایم ایس سی کی ڈگری رکھنے والی محترمہ شاہین بدر گذشتہ 34 سالوں سے نیشنل ہائی اسکول مرڈیشور میں سائنس کی ٹیچر ہیں جبکہ 2017 سے وہ ہیڈ مسٹریس کے طور پر اپنی خدمات انجام دے رہی ہیں، ان کا تعلق بھوپال سے ہے۔ بتایا گیا ہے کہ انہوں نے انجمن گرلز ہائی اسکول بھٹکل سے میٹرک پاس کرنے کے بعد بھوپال کی صفیہ کالج سے بی ایس سی، بی ایڈ اور ایم ایس سی کی ڈگری لی تھی۔
اسی طرح لوور پرائمری کے شعبہ میں بھٹکل کے جالی کوڑی سرکاری اسکول کی ٹیچر پدماوتی ایچ نائیک جبکہ ہائیر پرائمری شعبہ میں بھٹکل کے نوز دیہات میں واقع سرکاری اسکول کے ٹیچر موہن نائک کو بیسٹ ٹیچر کے اعزاز سے نوازا جائے گا۔
لوور پرائمری، ہائیر پرائمری اور ہائی اسکول کے بیسٹ ٹیچر کے طور پر کاروار سے تین ٹیچرس سویتا بی نائیک، رام چندرا پی گوڈا اور دنیش پنڈری ناتھ کینرکر، انکولہ سے شیوانند ناگو گوڈا، سویتا تمنّا کوچیناڈ اور پشپالتا جی نائیک ، کمٹہ سے کلپنا بیرنّا نائیک، رویندر کرشنا بھٹ سوری اور تارا نارائین نائیک اسی طرح ہوناور سے گنپتی ٹی نائک، بھاگیرتی کرشنا ہیگڈے اور ایم ٹی گوڈا کو اعزاز سے نوازا جائے گا۔