پانچ کھیل دیہی اسپورٹس کے طو رپر نشاندہ کئے گئے ہیں: وزیر اعلیٰ بومئی
بنگلورو، 3؍اکتوبر (ایس او نیوز) ریاستی وزیر اعلیٰ بسواراج بومئی نے کہا کہ کمبلا، کبڈی، کھوکھو، کشتی اور بیل گاڑی دوڑ کو دیہی اسپورٹس قرار دیا گیا ہے۔ بی جے پی رعیت مورچہ، بنگلور نارتھ ضلع کی جانب سے وزیر اعظم نریندر مودی کے جنم دن کے پیش نظر چندر شیکھر آزاد میدان میں منعقد کبڈی ٹورنمنٹ ”نمو کسان کپ“ کا افتتاح کرتے ہوئے بومئی نے یہ جانکاری دی۔
انہو ں نے کہا کہ 5کھیلوں کو رورل اسپورٹس کے طور پر منتخب کیا گیا ہے اور ان کے فروغ کے لئے ہر ممکن امداد فراہم کی جائے گی۔ انہو ں نے کہا کہ اسپورٹس میں حصہ لینے سے جسمانی صحت کے ساتھ دماغی سکون بھی حاصل ہوگا،اس لئے تمام افراد ایسے مقابلوں میں حصہ لیں۔ انہو ں نے کہا کہ وزیر اعظم نریندر مودی نے نوجوانوں، خواتین اور دیگر افراد کے مفاد میں کئی اسکیموں کو جاری کیا ہے اور ان کے نام پر اس مقابلہ کا اہتمام معنی خیز ہے۔ بی جے پی رعیت مورچہ کے صدر ایرناکڈاڈی نے کہا کہ وزیر اعظم نریندر مودی کی پالیسیوں اور اسکیموں کی وجہ سے آج کسانوں کو دوگنا منافع حاصل ہورہا ہے۔
اس موقع پر رکن پارلیمان سدانندا گوڈا، بی جے پی کے جنرل سکریٹری روی کمار، ریاستی وزیر ہالپا آچار، شنکر پاٹل منینا کوپہ ودیگر حاضر رہے۔