گروگرام میں اندوہناک سڑک حادثہ، شادی سے لوٹ رہے 5 افراد کی دردناک موت
گروگرام،3؍دسمبر (ایس او نیوز؍ایجنسی) جمعرات اور جمعہ کی درمیانی شب گروگرام کے گڑھی گاؤں کے پاس سدھرانا روڈ پر ایک کار سڑک کنارے دیوار سے ٹکرا کر پلٹ گئی جس میں پانچ لوگوں کی موت ہو گئی۔ پولیس کے مطابق مہلوکین کی شناخت ساگر، جبیک، نیاز خان، پرنس اور جگبیر کی شکل میں ہوئی ہے۔ واقعہ میں ہاردک تیواری نام کا ایک شخص زخمی بھی ہوا ہے۔ متاثرین ایک شادی میں شامل ہونے کے بعد گاؤں سدھرانا سے گروگرام شہر لوٹ رہے تھے۔
گروگرام پولیس ترجمان سبھاش بوکن کا کہنا ہے کہ ’’وہ سبھی سدھرانا گاؤں میں ایک شادی تقریب سے لوٹ رہے تھے۔ یہ حادثہ تیز رفتار اور خستہ حال سڑک کا نتیجہ تھا۔ سبھی متاثرین شہر کے ایک نجی اسپتال میں کام کرتے تھے۔ پولیس ضروری کارروائی کر رہی ہے۔‘‘ انھوں نے مزید کہا کہ ’’زخمی شخص کو سنگین حالت میں اسپتال میں داخل کرایا گیا ہے۔ لاشوں کو پوسٹ مارٹم کے لیے بھیج دیا گیا ہے۔ آگے کی جانچ جاری ہے۔‘‘