کاروار 21/ستمبر (ایس او نیوز) ماہی گیری کے لئے نکلے ہوئے گہرے سمندر میں جانے کے بعد مصیبت کا شکار ہونے والے 8ماہی گیروں کو کوسٹ گارڈ ز نے بچالیا ہے۔ خیال رہے کہ گزشتہ چار دنوں کے دوران کوسٹ گارڈز کے ذریعے ماہی گیروں کو بچانے کا یہ دوسرا معاملہ ہے۔
کوسٹ گارڈز کے ڈپٹی انسپکٹر جنرل ایس ایس ڈسیلا نے بتایا کہ جمعرات کی شام کو کاروار کے محکمہ ماہی گیری کے ڈائریکٹر نے کوسٹ گارڈز سے رابطہ قائم کرتے ہوئے شری درگا نامی ماہی گیر کشتی بیچ سمندر میں تکنیکی خرابی کا شکار ہوگئی ہے اور اس کی وجہ سے اس کشتی میں موجود 8ماہی گیروں کے لئے خطرہ لاحق ہوگیا ہے۔لہٰذا ان مصیبت زدہ ماہی گیروں کو فوری امداد فراہم کی جائے۔
اس کے بعد کوسٹ گارڈز نے مصیبت زدہ کشتی سے قریب ہی ماہی گیری میں مصروف گرو جیوتی نامی کشتی سے رابطہ قائم کیا اور اس کی مدد سے متاثرہ کشتی کو ساحلی کنارے تک کھینچ لانے کا کام انجام دیا۔اسی طرح کی ایک کارروائی 17ستمبر کو بھی کوسٹ گارڈز نے انجام دی تھی، جس میں سمندر کے اندر مصیبت کا شکار ہونے والے 23ماہی گیروں کو بچالیاگیا تھا۔