انکولہ کے سمندر میں ماہی گیر ڈوب کر ہوگیا لاپتہ۔ تلاشی مہم جاری
انکولہ26؍مارچ ( ایس او نیوز) چھوٹی دیسی کشتی (پاتی ) میں مچھلی کے شکار کے لئے سمندر میں جانے والا ایک شخص ڈوب کر لاپتہ ہوگیا ہے ۔ کوسٹل سیکیوریٹی پولیس، نیوی کا عملہ اور ماہر غوطہ خوروں کی مدد سے لاپتہ ماہی گیر کو تلاش کرنے کی مہم جاری ہے۔
سمندر میں غرقاب ہونے والے ماہی گیر کا نام نارائن مکند کھاروی (59سال) بتایا جاتا ہے جو کہ انکولہ کے بیلمبار میں مدھیہ کھاروی واڈا کارہنے والا ہے۔بتایاجاتا ہے کہ نارائن کی پاتی کشتی سمندر میں اٹھنے والی تیز موجوں کا شکار ہوگئی اور وہ الٹ گئی۔ مقامی ماہی گیر فوری طور پر اس کی مدد کے لئے دوڑ پڑے مگر تیز سمندری موجوں کی وجہ سے نارائن دیکھتے ہی دیکھتے لاپتہ ہوگیا۔اس تعلق سے محکمہ ماہی گیری کی اسسٹنٹ ڈائریکٹررینیٹا ڈیسوزا اور ریوینیو انسپکٹر امر نائک کو رپورٹ بھیج دی گئی ہے۔ڈپٹی کمشنر ڈاکٹر ہریش کمار کی ہدایت کے مطابق بیلمبار کے ساحلی علاقے میں بحریہ کے عملے کی طرف سے تلاشی مہم جاری ہے۔