منگلورو 22/جون (ایس او نیوز) سٹی پولیس کمشنر سندیپ پاٹل نے فون اِن پروگرام کے دوران ایک شخص کی شکایت پر ردعمل ظاہر کرتے ہوئے کہا کہ مچھلیوں سے بھرے ٹرک نقل وحمل کے دوران گندا پانی جو سڑکوں پرچھوڑتے ہیں اور عوام کے لئے تکلیف کاباعث بنتے ہیں اس پر پوری طرح روک لگادی جائے گی۔ انہوں نے کہا کہ بارش کا موسم ختم ہونے اور ماہی گیری شروع ہونے سے پہلے تمام ٹرکس کو گنداپانی جمع کرنے والے ٹینکس لگانے ہونگے۔

 پاٹل نے کہا کہ ماہی گیروں کی انجمن سے تفصیلات طلب کی جارہی ہیں کہ ابھی کتنے ٹرکس ایسے ہیں جن میں گنداپانی جمع کرنے کے ٹینکس لگانا باقی ہے۔ اس موقع پر اے سی پی ٹریفک ایم منجو ناتھ شیٹی نے بتایا کہ اب تک ایسے 37ٹرکس ضبط کیے گئے ہیں جن میں ٹینکس نہیں لگائے گئے تھے اور وہ سڑکوں پر گندگی پھیلانے کا سبب بن رہے تھے۔
    پولیس کمشنر سندیپ پاٹل نے مزیدبتایا کہ مال بردار گاڑیوں اور طلبہ کو لے جانے والی اسکولی گاڑیوں کی جانب سے ہونے والی قانونی خلاف ورزیوں کا جائزہ خود سپریم کورٹ کی طرف سے لیاجارہا ہے۔ ہم نے 280مال بردار گاڑیوں اور 60اسکولی گاڑیوں کے خلاف کارروائی کی ہے۔ہم نے آر ٹی او کو بھی مراسلہ بھیج کر مانگ کی ہے کہ فوری طور پر ایسی خلاف ورزیاں کرنے والے ڈرائیوروں کے لائسنس اور پرمٹ کینسل کردئے جائیں۔