نو تشکیل شدہ لوک سبھا کا پہلا سیشن شروع، وزیر اعظم اور نو منتخب ارکان نے حلف لیا
نئی دہلی، 17 جون(ایس او نیوز/آئی این ایس انڈیا)17ویں لوک سبھا کا پہلا سیشن پیر کو شروع ہوا اور اس موقع پر وزیر اعظم نریندر مودی، وزیر دفاع راج ناتھ سنگھ اور وزیر داخلہ امت شاہ سمیت مختلف مرکزی وزراء اور ملک بھر سے منتخب کر کے آئے ارکان نے حلف اٹھا لیا۔سیشن کا آغاز قومی دھن بجائے جانے کے ساتھ ہوا۔اس کے بعد قائم مقام صدر وریندر کمار نے ایوان کی روایت کے مطابق چند لمحات کی خاموشی رکھنے کے لئے ارکان سے کہا۔ارکان نے اپنے مقامات پر کھڑے ہوکر کچھ لمحات کی خاموشی رکھنے کے بعد کمار نے تمام نو منتخب اراکین کو مبارک باد دی۔کارگزار صدر نے اس کے بعدچیئرمین کے ناموں کا اعلان کیا۔پارلیمنٹ میں اس کے بعد نو منتخب ارکان کے حلف لینے کا عمل شروع ہوا۔سب سے پہلے وزیر اعظم نریندر مودی نے ایوان کے لیڈر ہونے کی وجہ سے ایوان زیریں کی رکنیت کا حلف لیا۔حلف لینے کے لئے جیسے ہی وزیر اعظم کا نام پکارا گیا اراکین نے میزیں تھپتھپاکر ان کا استقبال کیا جبکہ بی جے پی کے ارکان نے’مودی مودی‘ اور’بھارت ماتا کی جے‘ کے نعرے لگائے۔وزیر اعظم مودی نے ہندی میں بھگوان کے نام پر حلف لیا۔وزیر اعظم مودی کے بعد کانگریس کے رکن کے سریش، بیجو جنتا دل کے بی مہتاب اور بھاجپا کے برجبھوش شرن سنگھ نے حلف اٹھا یا۔سریش اور سنگھ نے ہندی اور مہتاب نے اڑیا میں حلف لیا۔کارگزار صدر وریندر کمار نے چیئرمین کے جس پینل کا اعلان اس میں یہ تینوں ممبران کے سریش، برجبھوش شرن سنگھ اور بی مہتاب شامل ہیں۔ان تینوں ارکان کے بعد وزیر دفاع راجناتھ سنگھ، وزیر داخلہ امت شاہ، سڑک وزیر ٹرانسپورٹ نتن گڈکری، کیمیکل اور کھاد وزیرڈی وی سدانند گوڑا،فروغ انسانی وسائل کے وزیر رمیش پوکھریال نشنک، وزیر صحت ہرش وردھن اور اسمرتی ایرانی سمیت کابینہ کے ارکان نے بھی حلف لیا۔وزراء میں ہرش وردھن، شریپد نائیک، اشونی کماری چوبے اور پرتاپ سارنگی نے سنسکرت زبان میں حلف لیا۔خواتین اور اطفال بہبود وزیر اسمرتی ایرانی کا نام حلف کے لئے پکارے جانے کے بعد بی جے پی کے کئی ارکان نے زور دار طریقے سے میزیں تھپتھپائی۔دراصل ایرانی کانگریس صدر راہل گاندھی کو امیٹھی سے شکست دے کر لوک سبھا پہنچی ہیں۔مغربی بنگال کوٹے سے وزراء بابل سپریو اور دیبشری چودھری کے نام حلف کے لئے پکارے جانے کے بعد بی جے پی ارکان نے ’جے شری رام‘ کے نعرے لگائے۔واضح رہے کہ گزشتہ دنوں مغربی بنگال کی وزیر اعلی ممتا بنرجی کے سامنے کچھ بی جے پی کارکنوں نے ’جے شری رام‘ کے نعرے لگائے تھے جس پر انہوں نے ناراضگی ظاہر کی تھی۔وزراء کا نام حلف کے لئے پکارے جانے کے دوران لوک سبھا سیکرٹری جنرل نے ایک بار بھولوش مرکزی وزیر دھرمیندر پردھان کا نام پکارا، جبکہ وہ ایوان کے رکن منتخب نہیں ہوئے ہیں،بعد میں انہوں نے بھول سدھاری اور پھر پرہلاد جوشی کا نام پکارا۔مرکزی وزیر اور اکالی دل کے لیڈر ہرسمرت کور بادل نے پنجابی اور بھاری صنعت وزیر اور شیوسینا لیڈر اروند ساونت نے مراٹھی زبان میں حلف لیا۔وزیر اعظم اور وزراء کے حلف برداری کے بعد ارکان نے ریاستوں کی ترتیب سے حلف لیا۔سب سے پہلے آندھرا پردیش کے ارکان، پھر آسام اور اس کے بعد بہار کے ارکان نے حلف لیا۔حلف برداری کے موقع پر ایوان میں یو پی اے سربراہ سونیا گاندھی، ترنمول کانگریس کے سندیپ بدھوپادھیائے، سماج وادی پارٹی کے ملائم سنگھ یادو اور اکھلیش یادو، نیشنل کانفرنس کے فاروق عبداللہ، ڈی ایم کے کی کنموئی، اے راجا اور دیاندھی مارن بھی موجود تھے۔سیشن کے شروع ہونے سے پہلے صدر رام ناتھ کووند نے وی ایندر کمار کو لوک سبھا کے نگراں صدر کے طور پر حلف دلایا۔