نئی دہلی17جولائی (ایس او نیوز/آئی این ایس انڈیا) وزیر اعظم نریندر مودی نے منگل کو پارٹی ممبران پارلیمنٹ سے کہا کہ انہیں سیاست کے ساتھ ساتھ سماجی علاقے میں بھی کام کرنا چاہئے، ساتھ ہی عوام کے مسائل کو پارلیمنٹ میں اٹھانا چاہئے۔ وزیر اعظم نے ساتھ ہی پارلیمنٹ میں روسٹر ڈیوٹی میں غائب رہنے والے وزرا ء کی شام تک تفصیلات بھی مانگی۔ انہوں نے کہا کہ پہلی بار جو اثر ہے، اس کا اثر آخر تک رہتا ہے۔ وزیر اعظم مودی نے آج بی جے پی پارلیمانی پارٹی کی میٹنگ سے خطاب کیا۔ یہ میٹنگ پارلیمنٹ ہاؤس لائبریری میں ہوئی۔ ذرائع کے مطابق وزیر اعظم نے کہا کہ ملک کے سامنے پانی کا بحران ہے اور اس کے حل کے لئے ممبران پارلیمنٹ کو کام کرنا چاہئے۔ وزیراعظم نے کہا کہ ممبران پارلیمنٹ کو اپنے علاقے کے حکام کے ساتھ ملاقات کر عوام کے مسائل کے بارے میں بات کرنی چاہئے۔ انہوں نے زور دیا کہ ممبران پارلیمنٹ اور وزرا ء کو پارلیمنٹ میں رہنا چاہئے۔ ذرائع نے بتایا کہ مودی نے بی جے پی پارلیمانی پارٹی کے اجلاس میں کہا کہ جو وزیر روسٹر ڈیوٹی میں موجود نہیں رہتے، ان کے بارے میں اسی دن شام تک انہیں بتایا جائے۔ وزیر اعظم نے ارکان پارلیمنٹ سے کہا کہ وہ سرکاری کام اور منصوبوں میں بڑھ چڑھ کر حصہ لیں، سماجی کاموں میں حصہ لیں اور جب پارلیمنٹ سیشن چل رہا ہو تو ایوان میں موجود رہیں۔