سرسی:16؍ جنوری(ایس اؤ نیوز ) ضلع اتر کنڑا کے سرسی کا دورہ کرتے ہوئے ریاست کے وزیر اعلیٰ بسوراج بومائی نے اعلان کیا کہ جنگلات اور ماحولیات کے تحفظ اور زراعت سمیت ماحولیات کےلئے معاون مطالعات کو فروغ دینے کا منصوبہ لےکر سرسی میں ریاست کی پہلی ماحولیاتی یونیورسٹی قائم کی جائے گی۔
سرسی سرکٹ ہاؤس میں اخبارنویسوں سے گفتگو کرتےہوئے وزیر اعلیٰ نےکہاکہ سرسی میں موجود فوریسٹ اور باغبانی کالجوں کوضم کرکے جنگلات اور جنگلی جانوروں کے تحفظ سمیت ماحولیات کی حفاظت اور زراعت سمیت ماحولیاتی معاون مطالعات کے لئے سہولت فراہم کی جائے گی اور عالمی حرارت کو کم کرنے کا مقصد لےکر سرسی میں ماحولیاتی یونیورسٹی قائم کی جائے گی۔ وزیر اعلیٰ نے کہاکہ آئندہ بجٹ میں اس کےلئے امداد منظورکرتےہوئے علاقے کے لوگوں کو ماحولیات کا تحفہ دیا جائےگا۔
وزیراعلیٰ نے کہاکہ سرسی میں زمین کھسکنے ، سبزعلاقے کی وسعت ، مغربی گھاٹ، ماحولیاتی حساس علاقے ، جنگلی جانوروں کی حفاظت ،جنگل اور آبادی کے درمیان ہم آہنگی ، جنگلات سےہونے والی آمدنی میں اضافہ،ماحولیات کی حفاظت سمیت مختلف موضوعات کا یونیورسٹی کے ذریعےمطالعہ ممکن ہوسکے گا۔ مجوزہ یونیورسٹی کے ساتھ ساتھ روایتی تعلیم آرٹس، کامرس، سائنس کی ڈگریاں بھی ہونگی ۔ اس کامپوزٹ یونیورسٹی کےلئے اگلے بجٹ میں فنڈ مختص کیا جائے گا۔