ساحلی کرناٹکا میں کورونا سے ہوئی پہلی موت؛ مینگلور کے قریب بنٹوال کی ایک خاتون جاں بحق
مینگلور 19/اپریل (ایس او نیوز) ساحلی کرناٹکا میں کوویڈ۔19 وبا پھیلنے کےبعد آج اتوار کو پہلی موت واقع ہوئی ہے۔ ذرائع سے ملی اطلاع کے مطابق ضلع جنوبی کینرا کے بنٹوال تعلقہ کے کسبا دیہات میں ایک 45 سالہ خاتون علاج کارگر نہ ہونے کے نتیجے میں آج اتوار صبح چل بسی ہے۔
ذرائع سے ملی اطلاع کے مطابق خاتون کو سانس لینے میں تکلیف ہونے کی وجہ سے بنٹوال تعلقہ اسپتال میں داخل کیا گیا تھا، جب تکلیف بڑھی تو وہاں سے پرائیویٹ اسپتال شفٹ کیا گیا، سنیچر کو اسے مینگلور کے وینلاک اسپتال میں داخل کیا گیا اور سنیچر کو ہی اس کے تھوک کے سیمپل جانچ کے لئے حاصل کئے گئے۔ اس سے پہلے کہ سیمپل کی جانچ رپورٹ سامنے آتی، خاتون اتوار صبح کو ہی چل بسی، دوپہر کو جب سیمپل کی رپورٹ ملی تو خاتون میں کوویڈ۔19 کے اثرات پائے گئے۔
خاتون کی موت کے ساتھ ہی نہ صرف دکشن کنڑا میں کورونا سے پہلی موت واقع ہونے کا معاملہ سامنے آیا بلکہ کورونا سے ہوئی موت سے پورے ساحلی کرناٹکا میں بھی تشویش کی لہر دوڑ گئی۔
یاد رہے کہ ضلع جنوبی کینرا میں کورونا پوزیٹو کے 13 معاملات سامنے آئے تھے جس میں سے 12مریض مکمل طور پر صحتیاب ہوکر اسپتال سے ڈسچارج ہوچکے ہیں، ایک مریض وینلاک اسپتال میں ایڈمٹ ہے اور اُس کا علاج جاری ہے، ایسے میں آج ہی ایک خاتون کی رپورٹ کورونا پوزیٹو آئی، مگر رپورٹ آنے سے پہلے ہی خاتون چل بسی ہے۔
ذرائع نے خبردی ہے کہ ضلع دکشن کنڑا میں کورونا سے پہلی موت واقع ہونے کے ساتھ ہی ضلعی انتظامیہ نے فیصلہ لیا کہ بنٹوال تعلقہ کو سیل ڈاون کیا جائے، جس کے فوری بعدبنٹوال ٹاون پولس نے جیپ کے ذریعے شہر میں سیل ڈاون کا اعلان کیا اور عوام سے کہا گیا کہ وہ اپنے اپنے گھروں میں بند ہوجائیں۔
بتایا گیا ہے کہ مہلوک خاتون کا بیٹا مارچ 16 کو دبئی سے آیا تھا، الزام لگایا گیا ہے کہ وہ کورنٹائن میں نہیں تھا، اب جیسے ہی خاتون کی موت کا معاملہ سامنے آیا، خاتون کے بیٹے اور شوہر سمیت ساس کو بھی کورنٹائن میں بھیجا گیا ہے۔ ذرائع نے اس بات کی بھی اطلاع دی ہے کہ مہلوک خاتون کی ساس کی بھی حالت نازک ہے اور اُسے آئی سی یو میں رکھا گیا ہے۔