ہندوستان سے عازمین حج کا پہلاقافلہ سوئے حرم روانہ
لکھنؤ، 22/مئی(ایس او نیوز/ایجنسی)اترپردیش کی راجدھانی لکھنؤ میں واقع چودھری چرن سنگھ انٹرنیشنل ائیر پورٹ سے ریاست سے حج بیت اللہ کیلئے عازمین حج کا پہلا قافلہ آج روانہ ہوگیا۔ ریاست سے آج دو طیارے عازمین کو لے کر روانہ ہوں گے۔ پوری دنیا سے عازمین حج کو لے کر جانے والے طیاروں میں یہ سب سے پہلا طیارہ ہوگا جو مدینہ منورہ پہنچے گا۔پہلے سے طے شدہ ٹائم ٹیبل کے مطابق 288عازمین حج کے پہلے قافلے کو لے کر جانے والے طیارہ نے 12 بجے چودھری چرن سنگھ انٹرنیشنل ائیر پورٹ سے اپنی پرواز بھری۔
مولانا علی میاں میموریل حج ہاؤز سروجنی نگر لکھنؤ پر مہمان خصوصی کی حیثیت سے امام عیدگاہ مولانا خالد رشید فرنگی محلی و مرکزی وزیر کوشل کشور، اترپردیش حکومت کی جانب سے دانش آزاد انصاری،حج کمیٹی کے چیئرمین محسن رضا نے ہری جھنڈی دکھا کر عازمین کے قافلے کو روانہ کیا۔عازمین حج ہاؤز سے بذریعہ بس ائیر پورٹ پر پہنچیں گے۔اس سے قبل عازمین حج کو مبارک سفر کیلئے رخصت کرنے حج ہاؤز تشریف لائے اہل خانہ نے آبدیدہ آنکھوں کے ساتھ گلے مل کراور ہاتھ ہلا کر روانہ کیا۔
اس موقع پر ان لوگوں نے عازمین حج کو مبارک باد دیتے ہوئے ملک و ریاستی حکومت و حج کی سروس میں لگے ہوئے لوگوں کیلئے ملک کی فلاح و بہبود و ترقی کی دعا کرنے کی گزارش کی۔ائیر پورٹ پر مسافروں کے طیارے کا افتتاح لکھنؤ کے ڈی ایم نے فیتہ کاٹ کرکیا۔اس موقع پر ائیر پورٹ پر سعودی حکومت و سعودی ائیر لائنس کے افسروں، ائیر پورٹ اتھارٹی، کسٹم امیگریشن و حج کمیٹی کے افسروں نے پھولوں کی بارش کر کے عازمین حج کو روانہ کیا۔
پہلے طیارے کے ذریعہ سفر حج کیلئے روانہ ہوئے 288عازمین میں 149مرد اور 139خواتین شامل ہیں۔اس طیارے میں سب سے زیادہ 150عازمین حج لکھنؤ اور 94 زائرین بارہ بنکی کے ہیں۔اسی طیارے میں ہائی کورٹ کے جج عبد المعین اپنے کنبے کے ساتھ حج بیت اللہ کے عزم کے ساتھ روانہ ہوئے ہیں۔وہیں آج ہی کے دن روانہ ہونے والے دوسرے طیارے میں 282عازمین تھے جن میں 151 مرد اور131خواتین شامل ہیں۔قابل ذکر ہے کہ سروجنی نگر واقع علی میاں میموریل حج ہاؤز میں عازمین حج کے قیام و طعام کا انتظام ہے۔حج ہاؤز میں ہی سعودی ائر لائنس کے کاؤنٹر بھی بنائے گئے۔ اس سے عازمین حج اپنا سامان جمع کر کے حج ہاؤز میں ہی چیک ان کراسکیں گے۔
ملحوظ ر ہے کہ حج بیت اللہ۔2023 کے تحت اترپردیش سے اس بار کل25444عازمین حج سفرکریں گے۔ اترپردیش میں کل 26786/ امیدواروں نے درخواست دی تھی جن میں سے 1342/ افراد نے کن ہی وجوہات کی بنیاد پر اپنے فارم واپس لے لئے تھے۔ان مجموعی تعداد میں سے 12070عازمین غازی آباد حج ہاؤز کے تحت دہلی سے سفر طے کریں گے جبکہ10901عازمین لکھنؤ سے روانہ ہوں گے۔2473عازمین وارانسی سے روانہ ہونے والے تھے لیکن کچھ تکنیکی وجوہات کی وجہ سے اب انہیں بھی لکھنؤ سے ہی سفر کرنا پڑے گا۔ملحوظ رہے کہ ایک عازم حج کو غیر ملکی کرنسی کی شکل میں کم سے کم 1500 / اور زیادہ سے زیادہ10ہزار سعودی ریال اپنے ساتھ لے جانے کی اجازت ہے۔اس کیلئے انہیں اسٹیٹ بینک آف انڈیا سے روپئے دے کر سعودی کرنسی لینی ہوگی۔
