منگلورو،17؍جون (ایس او نیوز) پردیس میں پھنسے ہندوستانیوں کو واپس لانے کے لئے مختلف افراد اور تنظیمیں اپنے اپنے طور پر چارٹرڈ فلائٹس کا انتظام کررہی ہیں، جس کے نتیجے میں سعودی اور دبئی سے سیکڑوں کنڑیگاس کے اپنے شہرلوٹنے کا سلسلہ شروع ہوگیا ہے۔ 

اسی کڑی میں اب کویت میں رہنے والے کرناٹکا کے شہری بھی جڑ گئے ہیں۔ آج 17جون کی شام 5بجے کویت میں پھنسے 160مسافروں کو لے کر جزیرہ ایئر ویز کا پہلا چارٹرڈ طیارہ منگلورو انٹرنینشنل ایئر پورٹ پر اترنے والاہے۔بتایا جاتا ہے کہ اکبر ٹراویلس کی جانب اس چارٹرڈ فلائٹ کا انتظام کیا گیاجس میں تمام کنڑا اور تُولُو افراد کو سہولت فراہم کی گئی ہے۔چونکہ قانونی طورپرہندوستان پہنچنے پر7دنوں کے لئے کوارنٹین کرنا لازمی ہے اس لئے ان مسافروں کے لئے کویت ایئر پورٹ سے ہی ہوٹلوں کی بکنگ کروائی گئی ہے۔

یہ بھی معلوم ہوا ہے کہ14؍جو ن کو کویت کی ایک آئیل ریفائنری میں آتش زدگی کے بعد جل کرہلاک ہونے والے ستیش کوچو شیٹی (45سال) کی لاش  بھی اسی چارٹرڈ فلائٹ سے لانے کا انتظام کیا گیا ہے۔