بھٹکل 13/ اکتوبر (ایس او نیوز) ضلع اُترکنڑا کے یلاپور تعلقہ کے ایڈگوندی کے قریب نیشنل ہائی وے 63 پربدھ علی الصبح ایک کیمیکل ٹینکر پلٹ گیا اور اس میں سے رسنے والے کیمیکل میں آگ بھڑک اٹھی جو سیکڑوں میٹر دور تک پھیل گئی ۔ اس کی وجہ سے اس راستے پر ٹریفک کا نظام درہم برہم ہوگیا ۔
ذرائع سے ملی اطلاع کے مطابق حادثہ صبح قریب 5:30 بجے اُس وقت پیش آیا جب مینگلور سے کیمیکل سے بھرا ٹینکر ممبئی جارہا تھا کہ ایڈگونڈی موڑ پر اچانک اُلٹ گیا، سڑک پر ٹینکر اُلٹ کر گرنے کی آواز دور دور تک سنائی دی جس کے ساتھ ہی کیمیکل رسنا شروع ہوگیا اور پل بھر میں آگ کے شعلے بلند ہوگئے ۔ یہ تو اچھا ہوا کہ ٹینکر ڈرائیور اور کلینر نے فوری طور پر جائے حادثہ سے دور چلے گئے اور اپنی جان بچانے میں کامیاب ہوگئے۔
اطلاع ملتے ہی یلاپور پولس اوریلاپور، سرسی اور منڈگوڈ سے فائر بریگیڈ کی گاڑیاں اور عملہ جائے وقوع پر پہنچا اور صبح قریب آٹھ بجے آگ پر قابو پالیا گیا، جس کے بعد ہی نیشنل ہائی وے کو سواریوں کے لئے کھولا جاسکا۔
جس مقام پر یہ ٹینکر پلٹ گیا ہے اس علاقہ میں آبادی بہت زیادہ نہیں ہے اس لئے جانی نقصان نہیں ہوا، البتہ کھیتی باڑی اور اطراف کے باغات میں آگ پھیلنے سے فصلیں ، درخت اور جھاڑیاں جل کر خاکستر ہوگئیں۔ کھیتوں کو پانی سپلائی کرنے کے لئے جو پمپ سیٹ لگایا گیا تھا، آگ لگنے سے پمپ سیٹ سمیت دیگر اشیاء بھی جل کر خاک ہوگئی۔
اس حادثہ کے ساتھ ہی ستمبر 2015 میں کمٹہ کے برگی میں ہوئے گیس ٹینکر الٹنے اور آگ سے ہونے والے المیہ کی یادیں لوگوں کے ذہنوں میں تازہ ہوگئیں جس میں ایک ہی خاندان کے چھ سمیت جملہ 9 لوگوں کی موت واقع ہوئی تھی جبکہ کئی لوگ شدید زخمی بھی ہوئے تھے۔اب تازہ حادثہ کے بعد نیشنل ہائی وے کے کنارے بسنے والے عوام کی فکر اور تشویش بڑھ گئی ہے ۔
ستمبر 2015 میں کمٹہ کے برگی میں کس طرح کی واردات پیش آئی تھی، اُس کی تفصیلات کے لئے ساحل آن لائن کی اُس وقت کی خصوصی وڈیو رپورٹ دیکھ سکتے ہیں:
اُس وقت کی اُردو وڈیو رپورٹ: