بھٹکل 4 مارچ (ایس او نیوز)   نوائط کالونی   کے قریب   مریم علی مسجد کے احاطے میں  مریم علی یوتھ کے اشتراک سے  فائر بریگیڈ کے عملہ کی جانب سے  علاقہ کے نوجوانوں  کے لئے  آگ پر قابو پانے کا عملی مظاہرہ پیش کیا گیا جس   میں   فائر بریگیڈ کے آفسران نے لائیو فائر فائٹنگ پروگرام کے ذریعے نوجوانوں کو سکھایا کہ  کس طرح مختلف طریقوں سے آگ پر قابو پایا جاسکتا ہے۔

 پروگرام میں شرکت کرنے والے نوجوانوں  کو آگ پر قابو پانے سے متعلق کئی  اہم جانکاری دی گئی  ، اس موقع پر فائر بریگیڈ کی جانب سے   ایس رمیش نے بتایا کہ بھٹکل کے نوجوان  کسی بھی طرح کے حادثات  پیش آنے پر فوری مدد کے لئے آگے بڑھتے ہیں، یہی وجہ ہے کہ ہم چاہتے ہیں کہ  بھٹکل کے الگ الگ مقامات پر نوجوانوں کو اس طرح کے لائیو فائر فائٹنگ کا طریقہ   سکھائیں اور  نوجوانوں کو  تیار کریں کہ وہ  آگ لگنے جیسے حادثات پیش آنے پر  آگ بجھانے میں ہماری مدد کرسکیں۔ انہوں نے کہا کہ ہم ہر ماہ چار ایسے پروگرام مختلف علاقوں میں منعقد کرنا چاہتے ہیں اور نوجوانوں کو آگ پر قابو پانے کے مختلف طریقوں سے واقف کرانا چاہتے ہیں۔ انہوں نے موقع پر موجود    بھٹکل لیڈر عنایت اللہ شاہ بندری سے درخواست کی کہ وہ  بھٹکل کے الگ الگ علاقوں میں اس طرح کے تربیتی پروگرام منعقد کرنے میں  مدد کریں۔ عنایت اللہ شاہ بندری نے اس موقع پر فائر بریگیڈ عملہ کا شکریہ ادا کیا اور اپنی جانب سے ہر ممکن تعاون دینے کا یقین دلایا۔  علاقہ کے دیگر ذمہ داران میں  مریم علی مسجد  کے سکریٹری  عُمیر خلیفہ ندوی،  عبدالبر صدیقی ، عمار رکن الدین وغیرہ موجود تھے۔

فائر بریگیڈ کی جانب سے آگ بجھانے کا عملی مظاہرہ پیش کرنے  میں   ایس رمیش کے ساتھ ساتھ دیگر عملہ  محمد شفیع، رگھو اچاری،  شیو پرساد،  سچن،   اکشے اور پرشوتم موجود تھے۔