ضمیر احمد خان کو جان سے مارنے کی دھمکی پولیس کی طرف سے جے ڈی ایس کارکن کے خلاف ایف آئی آر
بنگلورو،28؍اگست(ایس او نیوز) سابق ریاستی وزیر اور رکن اسمبلی ضمیر احمد خان کے خلاف فیس بک پر توہین آمیز پوسٹ کرنے اور انہیں جان سے مارنے کی دھمکی دینے والے جے ڈی ایس کارکن کے خلاف پولیس نے ایف آئی آر درج کی ہے۔ نرسمہا مورتی نامی ملزم کے خلاف اتر ہلی کے نوین گوڑا نے شکایت درج کروائی۔ ضمیر احمد کے خلاف بنائے گئے اس مبینہ ویڈیو میں نرسمہا مورتی نے نہ صرف ان کو توہین آمیز لہجے میں مخاطب کیا ہے بلکہ ان کو جان سے مارنے کی دھمکی دی ہے۔ نرسمہا مورتی نے کہا ہے کہ ’تم نے سابق وزیر اعلیٰ کے خلاف غیر ذمہ دارانہ بیان دیا ہے۔ سیکورٹی کے باوجود ہم تمہیں پیٹ بھی سکتے ہیں اور مار بھی سکتے ہیں۔ایچ ڈی کے گجا پڑے نامی فیس بک اکاؤنٹ پر نرسمہا مورتی نے 11جون کو یہ پوسٹ کیا تھا۔چامراج پیٹ پولیس نے اس سلسلے میں تعذیرات ہند کی دفعہ 504کے تحت مقدمہ درج کرلیا ہے۔