کانگریس امیدوار ملند دیوڑا کے خلاف ایف آئی آر درج، مذہب کی بنیاد پر ووٹ مانگنے کا الزام،بی جے پی لیڈروں کے بیانات پرتماشائی
ممبئی،21؍اپریل (ایس او نیوز؍آئی این ایس انڈیا) بی جے پی لیڈران مسلسل متنازعہ بیانات دے رہے ہیں لیکن الیکشن کمیشن سادھوی،امت شاہ جیسے لوگوں پرکارروائی تونہیں کررہاہے وہ تماشائی بناہواہے لیکن اپوزیشن کے لیڈران پرفوراََنوٹس لے لیاجارہاہے۔ جنوبی ممبئی کے کانگریس امیدوار ملند دیوڑا کے خلاف ایف آئی آر درج کی گئی ہے۔ملند دیوڑا پر مذہب کی بنیاد پر ووٹ مانگنے کا الزام لگا ہے۔ایف آئی آر میں لکھا ہے کہ ملند دیوڑا نے 2 اپریل کو جنوبی ممبئی میں تشہیری مہم کے دوران کہا تھا کہ شیوسینا نے جین مندروں کے سامنے ’نان ویج‘ بنا کر’ویج‘ کی مخالفت کی تھی۔لہٰذا جین کمیونٹی انہیں اس انتخابات میں سبق سکھائے۔ملند دیوڑا کے خلاف آئی پی سی کی دفعہ 171, 125کے تحت مقدمہ درج کیا گیا ہے۔بتا دیں ملند دیوڑا ممبئی کانگریس کے صدر بھی ہیں۔انہیں یہ عہدہ حال ہی میں عام انتخابات سے پہلے دیا گیا تھا۔کانگریس کی ممبئی یونٹ کے صدر سنجے نروپم کو اچانک ان کے عہدے سے ہٹا دیا گیا تھا اور ان کی جگہ سابق مرکزی وزیر ملند دیوڑا کو ممبئی میں کانگریس کی کمان سونپ دی گئی تھی۔ سنجے نروپم کو ممبئی شمال مغرب پارلیمانی سیٹ سے پارٹی کا امیدوار بنایا گیا تھا۔غور طلب ہے کہ ملند دیوڑا نے ایک ٹویٹرپر ایک ویڈیو شیئرکیا تھا، جس میں ریلائنس کے چیئرمین مکیش امبانی ان کی حمایت کر رہے ہیں۔یہ ویڈیو ایسے وقت میں سامنے آئی ہے، جب کانگریس صدر راہل گاندھی مسلسل مکیش امبانی کے بھائی انل امبانی پر حملہ آور ہیں۔ملند دیوڑا کے شیئرکئے گئے ویڈیومیں مکیش امبانی کہتے سنائی دے رہے ہیں،ملند جنوبی ممبئی سے منسلک ہیں۔انہیں یہاں کی سماجی و اقتصادی اور ثقافتی سرگرمیوں کی اچھی سمجھ ہے۔دوسری طرف کانگریس کے امیدوار ملند دیوڑا نے ایک ٹویٹ میں کہاکہ چھوٹے دکاندار سے لے کر بڑے صنعت کاروں تک جنوبی ممبئی کا مطلب صنعت ہے۔ہمیں ممبئی میں صنعت کاری کو واپس لا کر نوجوانوں کو نوکری فراہم کرنے کی سمت میں کام کرنا چاہئے اور یہی اولین ترجیح ہونی چاہیے۔