چکمگلورو میں کووڈ گائیڈلائنس کی خلاف ورزی کا معاملہ؛ ’رتھ اُتسوا‘ منعقد کرنے کے الزام میں پجاری سمیت دیگر 8 کے خلاف معاملہ درج
چکمگلورو،19؍ جنوری (ایس او نیوز/آئی اے این ایس) کرناٹک پولیس نے کووڈ-19 کے پیش نظر جاری ڈپٹی کمشنر کے احکامات کی خلاف ورزی کرتے ہوئے ’رتھ اُتسوا‘ تقریب منعقد کرنے والے ایک پجاری سمیت 9 لوگوں کے خلاف ایف آئی آر درج کی ہے۔ مذہبی پروگرام کا انعقاد 17 جنوری کو چکمگلورو کے کدور تعلقہ کے سکھارایپٹن میں کیا گیا تھا۔
ڈپٹی کمشنر کے این رمیش نے شری شکونا راگناتھ سوامی مذہبی تقریب اور رتھوتسو کی تقریب پر پابندی کا حکم دیا تھا، جہاں بھگوان کی مورتی کو ایک پالکی میں رکھ کر ریلی کی شکل میں گھمایا جاتا ہے۔ اس حکم امتناع کے باوجود ہزاروں لوگوں نے مذہبی تقریب میں حصہ لیا اور تمام مذہبی رسومات ادا کئے گئے تھے۔
ریونیو انسپکٹر جتندر نے اس سلسلے میں سکھارایپٹن تھانہ میں شکایت درج کرائی تھی۔ شکایت کی بنیاد پر پجاری کرشنا بھٹ کے خلاف بدھ کے روز ایف آئی آر درج کی گئی۔ دیگر ملزمین میں نوین، ورون، ریتھو، سندیپ، سچن، گنیش، اُلاس اور نتن شامل ہیں۔ جن پر مذہبی تقریب کے انعقاد کرنے کا الزام ہے۔ معاملے کی جانچ جاری ہے۔
