بھٹکل میں فکروخبر میڈیا کی طرف سے فقہ شافعی آن لائن کوئیز مقابلہ، نوے افراد کے مابین تقسیم کئے گئے انعامات
بھٹکل 25/جون (ایس او نیوز) فکروخبر فقہ شافعی اور اسلامی افکار کے اشتراک سے منعقدہ پندرہ روزہ آن لائن فقہی مسابقہ کی انعامی نشست منگل کو منعقد کی گئی جس میں پروگرام میں شریک ہونے والے 1212 مساہمین میں سے 90 لوگ انعامات کے مستحق قرار پائے۔
پریس ریلیز جاری کرتے ہوئے فکرو خبر کی جانب سے بتایا گیا ہے کہ مسابقہ پندرہ روز تک جاری رہا۔ روزانہ دس سوالات متعلقہ وھاٹس اپ نمبر پر بھیجے جاتے تھے اور ان کے جوابات آپشن میں دئیے جاتے تھے، مساہمین کو صرف صحیح جواب پر نشان لگانا ہوتا تھا۔ البتہ مسابقہ کے گیارہویں روز سے پندرہویں روز تک مزید دس اضافی جوابات پوچھے گئے تھے۔ مسابقہ میں کل ایک ہزار دو سو بارہ لوگوں نے شرکت کی۔جن میں سے سو فیصد جوابات دینے والے سات افراد تھے جن کو چار چار ہزار روپئے انعامات دئیے گئے۔ اس کے ساتھ ساتھ 99.33 فیصد جواب دینے والے دس افراد، اسی فیصد سے زائد جواب دینے والے 321تھے جن میں سے تیس افراد کو قرعہ اندازی کے ذریعہ منتخب کیا گیا۔ سو فیصد حاضری میں 390 افراد شریک رہے جن میں سے بیس افراد کو قرعہ اندازی کے ذریعہ منتخب کیا گیا۔ اضافی سوالات کے مکمل جوابات دینے والے 18 افراد رہے اورا ن سبھی کو انعامات سے نوازا گیا۔اس کے علاوہ مزید انعامات سے بھی نوازا گیا، کل ملاکر مسابقہ میں نوے افراد کے مابین 72,500 کے انعامات تقسیم کئے گئے۔
پروگرام کی صدارت ادارہ فکروخبر کے صدر مولانا محمد الیاس صاحب ندوی نے فرمائی اور مہمانِ خصوصی کے طور پر قاضی مرکزی خلیفہ جماعت المسلمین بھٹکل مولانا خواجہ معین الدین ندوی مدنی، استاد تفسیر جامعہ اسلامیہ بھٹکل مولانا محمد انصار خطیب ندوی مدنی ، انجمن حامیئ مسلمین بھٹکل کے ایڈیشنل جنرل سکریٹری جناب محمد اسحاق شاہ بندری، استاد فقہ وحدیث جامعہ ضیاء العلوم کنڈلور مولانا مفتی فیاض احمد برمارے وغیرہ موجود تھے۔ جلسہ کی نظامت مولانا عبدالنور فکردے ندوی اور مولاناسید ابراہیم اظہر برماور ندوی نے کی اور شکریہ کلمات مولانا شافع شاہ بندری ندوی نے ادا کئے۔ جناب مفتی فیاض احمد صاحب کو صدر جلسہ اور مہمانانِ خصوصی کے ہاتھوں ان کی فکروخبر فقہ شافعی کے لئے دی گئی خدمات کے پیشِ نظر انہیں مبارکباد دیتے ہوئے اعزاز سے نوازا گیا۔ سوالات تیار کرانے میں فقہ شافعی کی علماء کمیٹی نے اپنی انتھک محنتیں صرف کیں اور آن لائن کے نظم ونسق کی جملہ ذمہ داریاں اسلامی افکار کے ذمہ دار جناب فضل الرحمن صاحب شاہ بندری صاحب نے بحسن وخوبی انجام دی۔
اس موقع پر پروگرام میں شریک مہمانان خصوصی نے اپنے اپنے تاثرات پیش کئے۔
