بھٹکل 25 ستمبر (ایس او نیوز) نوائطی ترجمہ قرآن کو آوڈیو کی شکل میں نشرکرنے والے مدرسہ خیرالعلوم کے طالب علم عثمان غنی ابن ناصر سدی باپا سمیت مدرسہ خیر العلوم سے حفظ قران مکمل کرنے والے انس مصباح کی تہنیت کی گئی جبکہ اسی اجلاس میں مولوی عقبہ برماور ندوی کی بھی غائبانہ طور پر ستائش کی گئی جنھوں نے مولوی ابوعبیدہ اکرمی ندوی کے پاس مسجد بریہ میں حفظ قرآن مکمل کرنے کی سعادت حاصل کی تھی۔
جمعرات بعد نماز عصر معہدالامام حسن البناء میں ان کے اعزاز میں تہنیتی پروگرام منعقد کیا گیا تھا جس میں اس بات پرعثمان غنی کی ستائش کی گئی کہ بھٹکل میں پہلی بار قران کا نوائطی ترجمہ آوڈیو کی شکل میں نشر کیا گیا ہے۔ جلسہ میں مدرسہ کے سرپرست مولانا محمد صادق اکرمی ندوی نے اپنے خطاب میں کئی قیمتی نصائح پیش کرتے ہوئے فرمایا کہ قرآن حفظ کرنا سنت ہے لیکن اس کو باقی رکھنا فرض ہے، ان ہی کے ہاتھوں ختم قرآن کی مجلس بھی ہوئی۔پروگرام کی صدارت سنبھالتے ہوئے مولانا ایوب برماور ندوی نے اپنے وقت کو صحیح استعمال کرنے کی طرف طلبہ کی توجہ دلائی نیز والدین کو اپنے بچوں کی تربیت پر زور دیا۔
پروگرام کا آغاز حافظ راف پیشمام کی تلاوت قران سے ہوا، مدرسہ کے طالب علم واعظ ابن جناب ارشاد صاحب دامودی ( متعلم خصوصی سوم ) نے نعت پڑھی مولانا طارق صاحب ( استاد مدرسہ خیرالعلوم ) نے اجلاس کی غرض و غایت بیان کرتے ہوئے مدرسہ کا تعارف پیش کیا، احمد مفضال اور ان کے ساتھیوں نے خوبصورت انداز میں مدرسہ کا ترانہ پیش کیا مدرسہ کے استاد مولانا جمیل صاحب نے نوائطی ترجمہ قرآن کا تعارف اور اس کے متعلق کچھ باتیں بیان کیں پھر مدرسہ کے طالب علم عثمان غنی سدی باپا نے مختصراً اپنے تاثرات پیش کیے، ناظم مدرسہ مولانا عبدالمغنی اکرمی نے اپنے خطاب میں مولوی عقبہ برماور اور انس مصباح کو تکمیل حفظ پر مبارکباد دی۔جلسے کی نظامت مولانا جمیل سدی باپا نے انجام دی۔
جماعت المسلمین کے نائب قاضی مولانا عبد العظیم قاضیا ندوی اور جماعت المسلمین کے صدر محتشم عبد الرحمن جان بھی اس موقع پر موجود تھے ۔