نئی تحقیق کے مطابق کورونا کا خوف حاملہ خواتین پر مضر اثرات پیدا کر رہا ہے
واشنگٹن،7؍دسمبر(ایس او نیوز؍ایجنسی) کورونا کو لے کر محققین مختلف پہلووں پر تحقیق کررہے ہیں جس کے نتیجے میں ہر روز نئے نئے انکشافات ہورہے ہیں، اسی طرح کی تحقیق میں اس بات کا بھی انکشاف ہوا ہے کہ کورونا کے خوف سے حاملہ خواتین پر مضر اثرات مرتب ہورہے ہیں اور ان میں ڈپریشن اور ٹینشن بڑھ جاتی ہے۔
محققین نے حاملہ خواتین اور بچے کو جنم دے چکی خواتین کے سروے کے بعد کئی طرح کی بیماریوں کے خدشات میں اضافہ کا انکشاف کیا ہے۔تازہ تحقیق کے نتائج کو ’سائیکو ریویو‘ رسالہ میں شائع کیا گیا ہے۔ تحقیق میں بریگھم اینڈ وومین ہاسپیٹل کے محققین شامل ہوئے تھے۔ قابل ذکر ہے کہ پوسٹ ٹرومیٹک اسٹریس ڈِس آرڈر دماغی صحت سے جڑا مسئلہ ہے۔ یہ کسی ایسے بھیانک واقعہ سے پیدا ہوتا ہے جسے شخص نے خود تجربہ کیا ہوتا ہے یا دیکھا ہوتا ہے۔
سائکیٹری محکمہ اور محکمہ امراض اطفال سے منسلک کنڈی لیو نے کہا کہ ’’ہم جانتے ہیں کہ مدت حمل میں خواتین کو خاص طور سے ذہنی صحت کی فکر کا جوکھم ہوتا ہے۔ ہم بنیادی طور سے دیکھنا چاہتے تھے کہ وبا سے جڑے کون سے فیکٹر کا تعلق ذہنی صحت علامتوں کے ساتھ ہو سکتا ہے۔‘‘