مینگلور 12/جون (ایس او نیوز) 63 سالہ کسان اور اس کی 32 سالہ بیٹی قریبی تعلقہ بنٹوال میں اُس وقت ہلاک ہوگئے جب اُن کے قدم نیچے گری ہوئی ایک بجلی کی تار پر پڑگئے۔ واردات منگل کی شام کو بنٹوال کے مضافات پیلی موگورو میں پیش آئی۔
پولس نے بتایا کہ مرنے والوں کی شناخت گوپالا کرشنا اور اس کی بیٹی دیویا کی حیثیت سے کی گئی ہے یہ دونوں منگل دیر شام کو طوفانی بارش کے چلتے ا گھاس لانے کے لئے اپنے بغیچے میں گئے تھے، اس موقع پر الیکٹرک کھمبے کی وائرنیچے گری ہوئی تھی، بے خیالی میں جیسے ہی ان کے قدم نیچے گرے ہوئے اُس تار پر پڑی ، دونوں کو بجلی کا جھٹکا لگا اور دونوں کی جائے وقوع پر ہی موت واقع ہوگئی۔
حادثے کی اطلاع ملتے ہی تحصیلدار ریشمی ایس آر، بنٹوال سرکل پولس انسپکٹر شرن گوڈا، پی ایس آئی سُدھاکر تونسے ودیگر کئی سرکاری اہلکار موقع پر پہنچے اور جائے وقوع کا جائزہ لیتے ہوئے گھروالوں کے ساتھ تعزیت کی۔
اس تعلق سے گوپال کرشنا کے قریبی رشتہ دار پرشوتم شٹی نے پولس تھانہ میں مینگلور الیکٹری سٹی سپلائی کمپنی لمیٹید (میسکام) کے خلاف لاپروائی کا الزام لگاتے ہوئے معاملہ درج کیا ہے۔