بھٹکل 23 جنوری (ایس او نیوز) بھٹکل آزاد نگر کی انفا کرکٹ ٹیم کے کھلاڑی نثار  احمد المعروف احمدی نے بھٹکل تعلقہ لیول ٹی ٹوینٹی کرکٹ ٹورنامنٹ میں  محض 27 گیندوں پر سنچری اسکور کرتے ہوئے  نیا ریکارڈ قائم  کیا ہے۔ اس سے قبل قریب دس بارہ سال پہلے  لبیک نوائط کے فرحان جوشیدی نے ایک سیریز میچ میں 28 گیندوں پر سنچری اسکورکرنے کا ریکارڈ قائم کیا تھا جبکہ تیز رفتار ہالف سنچری اسکور کرنے کا ریکارڈ آج بھی انفا کے سید عمران لنکا کے نام ہے جنہوں نے صرف 12 گیندوں پر  پچاس رن بنائے تھے۔

بھٹکل تعلقہ اسٹڈیم (وائی ایم ایس اے میدان)  میں   ینگ اسٹار کی جانب سے منعقدہ کرکٹ ٹورنامنٹ میں  آج سنیچر کو کھیلے گئے ایک لیگ میچ میں احمدی نے   سلطان یوتھ  ویلفیر اسوسی ایشن  (ایس ڈبلیو وائی اے) کے خلاف  کھیلتے ہوئے دس چھکوں اور 13 چوکوں کی مدد سے 119 رن اسکور کرڈالے اور محض 27 گیندوں پرتیز رفتار  سنچری اسکور کرنے کا بھٹکل تعلقہ لیول پر نیا ریکارڈ قائم کیا۔

انفا نے آج پہلے بلے بازی کرتے ہوئے مقررہ 20 اووروں میں 308 رنوں کا  پہاڑ کھڑا کردیا  جس کے ساتھ ہی ٹی  ٹوینٹی  ٹورنامنٹ میں بھٹکل تعلقہ میں   اتنا زیادہ اسکور کھڑا کرنے کا بھی نیا ریکارڈ بنا۔  آج کے میچ میں مخالف سلطانی ٹیم صرف92 رنوں پر آل اوٹ ہوگئی  اور انفا نے یہ میچ 216 رنوں سے جیت لیا۔

ینگ اسٹار کے اس ٹی ٹوینٹی  ٹورنامنٹ میں گذشتہ دن آرگنائزر ینگ اسٹار کے رزان موٹیا نے  مجموعی طور پر 137 رن اسکور کرنے کا بھی ریکارڈ بنایا، اوپنر بلے باز رضان نے  الاایمان ٹیم کے خلاف نہ صرف 137 رن بناڈالے بلکہ تمام 20 اووروں تک  کریز پر ہی ڈٹے رہنے میں بھی کامیاب رہے  یعنی  آخر تک وہ آوٹ بھی نہیں ہوئے۔

یاد رہے کہ ینگ اسٹارویلفیر آرگنائزیشن  کی جانب سے 8 جنوری سے بھٹکل وائی ایم ایس اے میدان میں بھٹکل تعلقہ لیول ٹی ٹوینٹی کرکٹ ٹورنامنٹ جاری ہے جس میں  منکی  سمیت 33 ٹیمیں حصہ لے رہی ہیں، ٹورنامنٹ کا فائنل مقابلہ فروری کے  پہلے ہفتے میں  ہوگا۔