سری نگر،2؍مارچ (ایس او نیوز؍ایجنسی) نیشنل کانفرنس کے نائب صدر اور سابق وزیر اعلیٰ عمر عبداللہ لوگوں سے کورونا کا ٹیکہ لگوانے کی تاکید کرتے ہوئے کہا ہے کہ جب میرے عمر رسیدہ والد ڈاکٹر فاروق عبداللہ کئی عارضوں میں مبتلا ہونے کے باوصف یہ ویکسین لے سکتے ہیں تو آپ لوگوں کو بھی لینی چاہیے۔
انہوں نے شیر کشمیر انسٹی ٹیوٹ آف میڈیکل سائنسز صورہ سری نگر کے اس عملے کا بھی شکریہ ادا کیا جنہوں نے ان کے والدین کو یہ ویکیسن لگائی۔ موصوف نے ان باتوں کا اظہار منگل کے روز اپنے ایک ٹوئٹ میں کیا۔
عمر عبداللہ کا ٹوئٹ میں کہنا تھا کہ ’’شیر کشمیر انسٹی ٹیوٹ آف میڈیکل سائنسز صورہ سری نگر کے ڈاکٹروں، نرسوں اور عملے کا مشکور ہوں۔ آج (یعنی 2 مارچ) میرے 85 سالہ والد اور والدہ کو کورونا ویکسین کی پہلی ڈوز دی گئی۔ میرے والد کئی عارضوں میں مبتلا ہیں جب وہ ویکسین لے سکتے ہیں تو آپ کو بھی لینی چاہیے۔‘‘