نئی دہلی، 17 جنوری (آئی این ایس انڈیا) زرعی قوانین کو لے کر حکومت اور کسانوں کے مابین جاری تنازع کے درمیان پیر کو سپریم کورٹ میں اس معاملے کی دوبارہ سماعت ہوگی۔ عدالت عظمی اس تعطل کو ختم کرنے کے لئے قائم کمیٹی کے ممبر ان کے معاملے پر بھی غور کرسکتی ہے۔

عدالت 26 جنوری کو یوم جمہوریہ کے موقع پر مجوزہ ٹریکٹر یا ٹرالی مارچ یا کسی اور مظاہرے پر پابندی کی درخواست پرسماعت کرتے ہوئے دہلی پولیس کے ذریعہ دائر کردہ مرکزی حکومت کی درخواست پر بھی سماعت کرے گی۔

چیف جسٹس ایس اے بوبڑے کی سربراہی میں عدالت کی بنچ نے ایک عبوری حکم میں نئے زرعی قوانین پر عمل درآمد کو اگلے احکامات تک روک دیا اور شکایات سننے اور ’ڈیڈ لاک‘ کے حل کی سفارش کے لئے چار رکنی کمیٹی تشکیل دی۔ کمیٹی میں بھارتیہ کسان یونین کے بھوپندر سنگھ مان، جنوبی ایشیاء کے بین الاقوامی فوڈ پالیسی ریسرچ انسٹی ٹیوٹ کے ڈائریکٹر، ڈاکٹر پرمود کمار جوشی، زرعی ماہر معاشیات اشوک گلتی اور شیٹکاری آرگنائزیشن کے صدر انیل گھنوٹ شامل تھے۔بھارتیہ کسان یونین کے بھوپندر سنگھ مان کمیٹی سے الگ ہوگئے ہیں۔