بھٹکل 9 ڈسمبر (ایس او نیوز) ملک میں پچھلے پندرہ دنوں سے کسان زرعی قوانین کی مخالفت کرتے ہوئے دہلی کے  سنگھو  بارڈر پر احتجاجی دھرنا دے کر بیٹھے ہوئے  ہیں، اس تعلق سے8 ڈسمبر کو بھارت بند کا بھی اعلان کیا گیا تھا جس کا پورے ملک پر اثر نظر آیا۔ آخر یہ پورا معاملہ کیا ہے آئیے دیکھتے ہیں؛

رواں سال ستمبر میں مودی  حکومت کے منظور کیے گئے قوانین کے خلاف کسان تنظمیں احتجاج کرتے ہوئے منظور کئے گئے زرعی قوانین کی مخالفت کررہی  ہیں، اس تعلق سے حکومت کے مابین مذاکرات کے کئی ادوار بھی ہوئے لیکن بات چیت   نتیجہ خیز ثابت نہیں ہو سکی۔ بتاتے چلیں کہ بی جے پی حکومت نےگزشتہ دنوں پارلیمنٹ  میں 3 زرعی آرڈیننس پیش کرتے ہوئے انھیں منظور کروالیا تھا اور اب یہ قانون کی شکل اختیار کرچکے ہیں۔

جب سے یہ زرعی قوانین منظور ہوئے ہیں،  پنجاب، ہریانہ اور دیگر ریاستوں کے کسان وقتاً فوقتاً احتجاج کررہے ہیں بعض اوقات ٹرینیں روک کر بھی مطالبات منوانے کی کوشش کی گئی۔ تاہم نومبر کے آخری ہفتے میں یہ احتجاج مزید منظم ہوگیا اور بڑی تعداد میں کسانوں نے دارالحکومت نئی دہلی کا رُخ کرلیا۔ البتہ انتظامیہ نے کسانوں کو دہلی میں داخل ہونے سے پہلے ہی روک دیا۔ اس دوران کسانوں اور پولیس کے درمیان جھڑپیں بھی ہوئیں جس کے بعد کسانوں نے ملک کے دیگر شہروں کو دہلی سے ملانے والی اہم شاہراہوں کو ہی بلاک کرتے ہوئے دہلی کے سنگھو بارڈر پر ہی   دھرنے پر بیٹھ گئے  اوراعلان کردیا کہ  مطالبات کی منظوری تک وہ اسی طرح دھرنے پر بیٹھے رہیں گے اوراحتجاج ختم نہیں کریں گے۔

ان قوانین کو لے کر مودی حکومت کا کہنا ہے کہ  ان قوانین سے نجی سرمایہ کاری کے ذریعے زرعی شعبے کی ترقی ہو گی۔ ان قوانین سے شدید مشکلات کے شکار ایگریکلچر سیکٹر میں اصلاحات ہوسکیں گی اور ان سے  کسانوں کو اپنی مصنوعات کی مارکیٹنگ  کرنے کی آزادی حاصل ہو گی۔لیکن ان قوانین کو لے کر  کسانوں کو خدشہ ہے کہ ان قوانین کے ذریعے  وہ  سرکاری سر پرستی سے محروم ہوجائیں گے اور انہیں  دھنا سیٹھوں کے رحم وکرم پر چھوڑ دیا جائے گا جو ان کا نہ صرف استحصال کریں گے بلکہ رفتہ رفتہ ان کی زمینوں پر بھی قابض ہوجائیں گے۔کسانوں کا کہنا ہے کہ  سرکار کسانوں کی  نہیں کارپوریٹ گھرانوں کے مفاد اور منافع کی فکر میں دبلی ہورہی ہے۔ پچھلے چند برسوں میں امبانی، اڈانی، ٹاٹا اور گوئنکا جیسے صنعت کار دال، چاول، آٹااور سبزیاں بیچنے لگے ہیں۔ پرانے کرانے کی دکانوں کی آمدنی پر ڈاکہ ڈالنے کے بعد اب ارب پتیوں کی بری نظر اناج اور سبزیوں کی کاشت پرٹکی ہوئی  ہے۔نئے قانون میں غذائی اجناس کو ضروری اشیاء کے زمرے سے ہٹانا سرمایہ داروں کو ذخیرہ اندوزی کی سہولت فراہم کرنا یہ سب کچھ   کارپوریٹ ساہوکاروں کے لئے کیا جارہا ہے۔ کسان  لیڈران کی مانیں تو مرکز کی مودی حکومت کسانوں کومسلسل دھوکے دے رہی ہے، اس نے عوام کو سچائی بتائے بغیر،جھوٹ اور فریب کا سہارا لیتے ہوئے کسان مخالف بل منظور کرالیے ہیں۔

ان زرعی قوانین کو واپس لینے کے مطالبے کے ساتھ جب 8 ڈسمبرکو بھارت بند کا اعلان کیا گیا تو  بڑے بڑے شہروں میں احتجاجی مظاہرے ہوئے، لیکن  اپنے آپ کو سیکولر پارٹیوں کی حامی کہنے والی کئی سماجی اور فلاحی تنظیمیں صرف زبانی دعوے کرتے نظر آئی   کہ ہم بھی کسانوں کے احتجاج کی حمایت کرتے ہیں، لیکن ان تنظیموں نے  نہ بند کا ساتھ  دیا اور نہ ہی ان تنظیموں نے کسی طرح کااحتجاجی مظاہرہ کیا۔ایک طرح سے دیکھا جائے تو یہ تنظمیں   بھارت بند کو ناکام بنانے کی  مرکزی حکومت کی کوششوں   کا بھرپور ساتھ دیتی نظرآئی۔کرناٹک کی بات کریں تو  بھارت بند کے موقع پر اکثر شہروں پر احتجاجی مظاہرے ہوئے، لیکن بعض علاقوں کو چھوڑ کر کہیں پر بھی بازاراور دکانیں بند نہیں رہیں، جس کو دیکھتے ہوئے کرناٹک کے وزیراعلیٰ  یڈٖی یورپا نے  کہا کہ بھارت بند کی کرناٹک کے عوام نے تائید نہیں کی۔ان کے مطابق  بشمول بنگلور ریاست کے کسی بھی شہر میں منظم طریقے سے بند نہیں منایاگیا جس  کا مطلب یہ ہے کہ  مودی نے کسانوں کی مخالفت میں کوئی فیصلہ نہیں کیا اور ریاست کے عوام مرکزی حکومت کے فیصلے کے ساتھ ہیں۔

یہ بات الگ ہے کہ زرعی قوانین کے خلاف کسانوں کی طرف سے کیا گیا ’ بھارت بند ‘ بڑی حد تک کامیاب رہا۔ بھارت بند سے کسانوں نے یہ ثابت کر دیا کہ ان کی تحریک پنجاب تک محدود نہیں ہے اور نہ ہی یہ کسی ایک سیاسی جماعت کے اشارے پر ہورہی  ہے بلکہ اس میں پورا ہندوستان شامل ہے ۔ اکھل بھارتیہ کسان مہا سبھا کے مطابق ملک بھر  کے کسانوں کی ۵۰۰؍ چھوٹی بڑی تنظیموں نے  اس  بند میں حصہ لیا اور اپنا احتجاج درج کروایا۔ اس بند کا  اثر ملک کے ۲۲؍ صوبوں میں بطور خاص رہا جبکہ۲۴؍ اپوزیشن پارٹیوں نے  بند کی حمایت کی، کسان مہا سبھا کا دعویٰ ہے کہ اس  بند کو ملک کے ۹۰؍ کروڑ لوگوں کا ساتھ ملا اور ان لوگوں نے براہ راست اپنے اپنے طور پر بھارت بند کی حمایت کی۔

مگر ان سب کے باوجودمودی حکومت  اپنی ضد پر قائم ہے کہ وہ قوانین کو واپس نہیں لے گی، مگر اُدھر کسان بھی اپنی ضد پر آڑگئے ہیں کہ جب تک تینوں قوانین کو رد نہیں کیا جائے گا، ان کا احتجاج شدید تر ہوتا جائے گا۔ اب  بدھ کو ہوئی سرکار سے بات چیت ناکام ہونے کے بعد   تازہ اطلاع یہ ہے کہ اب کسانوں نے 14 ڈسمبر کو پورے ملک میں احتجاجی مظاہرے کرنے کا اعلان کیا ہے، پریس کانفرنس میں کسانوں نے کہا ہے کہ وہ جیو JIO اور ریلائنس کابھی سارے ملک میں بائیکاٹ کریں گے، کسانوں نے یہ بھی کہا  کہ 12 ڈسمبر کو وہ ملک بھر کے ٹول پلازہ کو جام کردیں گے جبکہ  جئے پور۔ دہلی ہائی وے کو بند کردیں گے۔

بات چیت ناکام ہونے کے بعد مودی سرکار بہت بڑی مشکل میں گھرتی نظر آرہی ہے۔ سرکار کے لئے  مشکل یہ ہے کہ اگر حکومت  کسانوں کا مطالبہ مان کر نئے زرعی قوانین واپس لیتی ہے تو یہ نہ صرف اس کی شرمناک ہار ہوگی بلکہ اس بات کا اعتراف بھی ہوگا کہ یہ قوانین سرے سے غلط تھے۔ لیکن اگر مودی سرکار قوانین واپس نہیں لیتی تو برسوں کی انتھک محنت سے تراشا ہوا  ’’کسانوں کا مسیحا‘‘ کا نقاب وزیر اعظم کے چہرے پر سےاُتر جائے گا۔تجزیہ نگاروں کی مانیں تو  مودی جی کو  ایک اور ناقابل تلافی نقصان  یہ بھی ہوگا کہ  وہ لاکھوں کروڑوں سکھ ہمیشہ کیلئے بدگمان اور بر گشتہ ہوجائیں گے جنہیں بی جے پی بڑی مشقت سے مسلسل اپنے ہندوتوا کے نظریاتی شیشے میں اتارنے کی کوشش کررہی ہے۔ اس طرح دیکھا جائے تو  کہا جاسکتا ہے کہ  زرعی قوانین مودی حکومت کے گلے کی ہڈی بن گئی ہے،  اب یہ دیکھنا ہوگا کہ وہ  ہڈی کو واپس نکالتے ہیں  یا پھر اُسے اندر ہی نگلتے ہیں۔  بہرحال دیکھا جائے تو  کسانوں کا یہ اندولن  مودی سرکار کیلئے بہت بڑی اگنی پریکشا بن گیا ہے۔