نئی دہلی ،24؍جنوری (ایس او نیوز؍ایجنسی) کسان تنظیمیں 26 جنوری کو دہلی کے آؤٹر رنگ روڈ پر ٹریکٹر پریڈ لینے کی تیاریوں میں مصروف ہیں۔ پنجاب کے جالندھر اور پٹیالہ سے ٹریکٹر لے کر دہلی پہنچ رہے ہیں۔

کسان رہنماؤں کا دعویٰ ہے کہ پریڈ میں ایک لاکھ سے زیادہ ٹریکٹر شامل ہوں گے۔ 23 جنوری کو کسان ٹریکٹر پریڈ کی بھی مشق ہوگی ۔ دہلی پولیس نے ابھی تک ٹریکٹر پریڈ کی اجازت نہیں دی ہے۔ تصادم کے امکان کے پیش نظر کسانوں نے آنسو گیس اور واٹر کینن سے بچنے کے لئے ٹریکٹروں کو فائبر شیٹوں سے ڈھانپ لیا۔ کسان لیڈران کا دعوی ہے کہ 26 جنوری کی پریڈ میں ایک لاکھ ٹریکٹر شریک ہوں گے۔ٹریکٹروں کے اگلے حصوں میں بھاری لوہے سے ڈھکے ہوئے ہیں تاکہ وہ بیری کیڈنگ کو توڑ سکیں اور ٹریکٹروں کو نقصان نہ پہنچے ۔

گرداس پور کے ایک کسان نے بتایا کہ میں بھارتیہ کسان یونین راجیوال کی تنظیم سے وابستہ ہوں۔ میرے ساتھ 500 ٹریکٹر روانہ ہوئے ہیں ، جو 26 جنوری سے قبل دہلی پہنچیں گے۔ ذرائع کے مطابق گزشتہ کچھ دنوں میں جالندھر ، بٹھنڈا ، امرتسر اور فیروز پور جیسے اضلاع کے پانچ ہزار سے زیادہ ٹریکٹر دہلی کی سرحد پر پہنچ چکے ہیں۔جالندھر کے ایک نوجوان کسان جس پال سنگھ کا کہنا ہے کہ اس کے ساتھی تقریبا ً 50-55 ٹریکٹر لے کر آئے ہیں۔ اس کے لئے ان لوگوں نے 30 فٹ لمبی خصوصی ٹرالی تیار کی۔ اس طرح کی ٹرالیوں میں دو ٹریکٹر لادے گئے ہیں، کئی سارے ٹریکٹر بھی ٹریکٹر کے ساتھ باندھے گئے ہیں۔ اس کا مقصد ڈیزل کے اخراجات کو بچانا ہے۔ کسی ٹریکٹر کو پنجاب سے دہلی آنے کے لئے 15 سے 20 ہزار روپے ڈیزل لگتا ہے۔ ایسا کرنے سے ایک ٹریکٹر کے ڈیزل کی قیمت چار پانچ ٹریکٹروں پر آتی ہے۔