بھٹکل 23اکتوبر (ایس او نیوز) بھٹکل کے معروف کبڈی اور کرکٹ کھلاڑی اور ہردلعزیز نوجوان حمّاد صدیقہ ابن منصور صدیقہ (32) بدھ دیر رات کومینگلور اسپتال میں انتقال کرگئے۔ انا للہ و انا الیہ راجعون۔ جمعرات بعد نماز ظہر خلیفہ جامع مسجدمیں ان کی نماز جنازہ ادا کی گئی، اور غوثیہ محلہ پرانے قبرستان میں تدفین عمل میں آئی۔ اس موقع پر جنازہ میں سینکڑوں لوگ شریک تھے۔
بھٹکل لائن ٹیم کے بہترین کھلاڑی حمّاد اچھے اخلاق کے مالک تھے، صوم و صلاۃ کے پابند، کھیلنے کے دوران بھی ایمانداری، سماجی خدمات میں آگے سمیت ان کے اندر دیگر بہت سارے اوصاف تھے۔
بھٹکل انجمن کالج سے بی کام پھر بنگلور کالج سے ایم بی اے مکمل کرکے قریب دس سال قبل مرحوم حمّاد سعودی عر بیہ کے شہر جدہ میں اپنے بہنوئی کے ساتھ تجارت سے وابستہ ہوگئے تھے، جدہ جانے کے بعد وہاں بھی منعقدہ ایک کبڈی ٹورنامنٹ میں انہوں نے حصہ لیا تھا اور بہترین کھیل کا مظاہرہ پیش کرتے ہوئے نوجوانوں کو اپنا گرویدہ بنالیا تھا۔
حمّاد کو برین ٹیومر ہونے کی وجہ سے قریب دو ماہ قبل منگلور اسپتال میں ایڈمٹ کیا گیا تھا، جہاں انہوں نے بدھ کی شب کو بیوہ، دیڑھ سالہ بچی ، تین بہنیں والد اور والدہ سمیت بہت سارے متعلقین اور دوست احباب کو چھوڑ کر داعی اجل کو لبیک کہہ گئے۔ اللہ ان کی بھرپور مغفرت فرمائے۔
بھٹکل کارگیدے کے رہائشی حمّاد کے انتقال پر علاقہ کی مسجد حسن قاضیاء میں سنیچر بعدنماز عشاء تعزیتی اجلاس منعقد کیا گیا اسی طرح سعودی عربیہ کے جدہ میں بھٹکل مسلم اسوسی ایشن جدہ کی جانب سے اور بھٹکل شاذلی مسجد میں لائن اسپورٹس سینٹر کی طرف سے جمعہ کی شب کو تعزیتی اجلاس منعقدکیا گیا تھا جس میں کافی لوگ شریک ہو تے ہوئے مرحوم کے اوصاف حسنہ کو بیان کیا اور اُنہیں خراج عقیدت پیش کیا گیا ۔ اس موقع پر مرحوم جناب حمّاد کے حق میں مغفرت کی دعائیں کی گئیں اور متعلقین اور رشتہ داروں سے بھی تعزیت کا اظہار کیا گیا۔