اترکنڑا ضلع میں مزید بارش کے امکانات کے پیش نظر ریڈ الرٹ جاری :بھٹکل میں ریکارڈ 140ملی میٹر بارش
کاروار:22؍جولائی (ایس اؤ نیوز) ضلع کے ساحلی پٹی کے مقامات پر رات دن مسلسل برستی بارش کے نتیجےمیں عوامی زندگی بہت بری طرح متاثر ہوئی۔ پیر کی صبح سے شروع ہوئی بارش شام تک لگاتار برستی رہی ۔ ان حالات میں محکمہ موسمیات کی طرف سے ’ریڈ الرٹ ‘ جاری کرتے ہوئے علاقہ میں مزید بارش برسنے کا امکان بتایا ہے۔ محکمہ موسمیات سے جاری کردہ جانکاری کے مطابق مغربی علاقے سے فی گھنٹہ 40سے 50کلومیٹر کی رفتار سے ہوا چلنےکا اندیشہ ہے ماہی گیروں سے کہاگیا ہےکہ وہ مچھلی شکار کے لئے سمندر میں نہ اتریں۔ اترکنڑا ڈپٹی کمشنر ڈاکٹر ہریش کمار نے بتایا کہ زائد بارش ہونے پرمنگل کے دن اسکولوں اور کالجوں کو چھٹی دینے کے تعلق سے متعلقہ مقامات کے بی ای اؤ یا تحصیلدار مشترکہ طورپر فیصلہ لیں گے۔
اتوار کی رات سے پیر کا پورا دن بارش ہونے سے ضلع کے کئی مقامات کے نشیبی علاقے زیر آب ہوگئے ہیں، کئی سڑکیں اکھڑ گئی ہیں، نقل و حمل کے لئے کافی دشواری پیش آرہی ہے۔ ہوناور کے کرکی کراس پررات 5بجے بڑا درخت سڑک پر گر جانے سے صبح 7بجے تک ٹرافک نظام معطل رہا۔ گلیوں ، محلوں میں پانی جہاں تہاں بھر جانے سے تالاب نما نظر آرہے تھے۔ بجلی کے کھمبے گر گئے ہیں۔ اندرونی نالیوں کا پانی سڑکوں پر بہتا دیکھا گیا۔
بھٹکل تعلقہ میں کچھ ایسی ہی صورت حال رہی ۔ اتوار کی صبح 8بجے سے پیر کی صبح 8بجے سے کرناٹکا میں سب سے زیادہ بارش بھٹکل میں 140ملی میٹر (14سنٹی میٹر) ریکارڈ کی گئی ہے۔ شہر کے مخدوم کالونی علاقے میں ایک گھر کےکمپاؤنڈ کی دیوار گرنے سے نقصان ہونے کی اطلاع موصول ہوئی ہے۔ حسب معمول شمس الدین سرکل، رنگین کٹا سمیت شاہراہ پر پانی بھر جانے سے سواریوں کو گزرنے میں مشکلات کا سامنا رہا۔