بنگلورو،18؍جولائی(ایس او نیوز)  بنگلورومیں ایک ہفتہ مزیدلاک ڈاؤن میں توسیع کئے جانے سے متعلق اشارہ ملاہے۔شہرمیں کوروناوائرس کی چین بریک کرنے کے مقصدسے ایک ہفتہ تک لاک ڈاؤن نافذکیاگیاہے۔مگراس مدت میں مزیدایک ہفتہ کی توسیع کرنے کا مطالبہ شہر کے میئرگوتم کمارجین نے حکومت سے کیاہے۔ایک نیوزایجنسی کومعلومات فراہم کرتے ہوئے بی بی ایم پی میئرنے کہا کہ کووڈ۔19کے خلاف جدوجہدکے لیے ہمیں مزیدوقت درکارہے، شہرمیں مزیدایک اورہفتہ تک لاک ڈاؤن میں توسیع کی جاتی ہے توہمیں کووڈچین کا رابطہ توڑنے میں مددمل سکتی تھی۔انہوں نے کہاکہ شہر میں کووڈ۔19کے معاملات میں ہرگزرتے دن کے ساتھ اضافہ ہوتاجارہاہے،کل ایک ہی دن بنگلورمیں 2ہزارسے زائدکوروناکے پازیٹیوکیس پائے گئے۔انہوں نے خدشہ ظاہرکرتے ہوئے کہا آئندہ دنوں شہرمیں کووڈ۔19معاملات میں مزیداضافہ ہوسکتاہے۔ماہرین نے بھی یہی کہا ہے کہ بنگلورمیں کووروناکیسزمیں غیرمعمولی اضافہ ہو گا۔ ریاستی حکومت نے کرناٹک کی راجدھانی بنگلورومیں کوروناکے تانے بانے بکھیرنے کووڈپھیلاؤکی چین کاٹنے کے لیے 14جولائی رات 8بجے سے ایک ہفتہ یعنی22جولائی صبح 6بجے تک لاک ڈاؤن نافذکیاگیاہے۔