بانکوڑہ، 18 مارچ ( ایس او نیوز؍آئی این ایس انڈیا ) مغربی بنگال سی آئی ڈی نے بانکوڑہ ضلع میں ایک ٹرک سے بڑی مقدار میں دھماکہ خیز مواد برآمد کیا ہے۔یہ ٹرک تلنگانہ کی طرف سے آ رہا تھا۔ٹرک میں جلیٹن کی چھڑیں اور امونیم نائٹریٹ کے بیگ لائے جا رہے تھے۔

پولیس نے دھماکہ خیز مواد اور ٹرک کو ضبط کرنے کے بعد ڈرائیور کو گرفتار کر لیا ہے،پولیس اس سے مسلسل پوچھ گچھ کر رہی ہے۔معاملہ بانکوڑہ ضلع کے بیلیاٹور علاقے کا ہے۔دراصل مغربی بنگال سی آئی ڈی کو ایک خفیہ اطلاع ملی تھی کہ ایک ٹرک میں دھماکہ خیز مواد لایا جا رہا ہے۔اسی معلومات پر سی آئی ڈی نے کارروائی کرتے ہوئے جلیٹن کی چھڑیں اور امونیم نائٹریٹ کے بیگ ٹرک سے برآمد کر لئے۔

مغربی بنگال پولیس کے ایک سینئر افسر نے معلومات دیتے ہوئے بتایا کہ پکڑا گیا ٹرک تلنگانہ سے آ رہا تھا،ٹرک میں جلیٹن کی چھڑوں کے قریب 250 پیکٹ موجود تھے،جبکہ امونیم نائٹریٹ کے 229 بیگ برآمد کئے گئے ہیں۔پولیس افسر نے بتایا کہ ٹرک ڈرائیور کو گرفتار کر لیا گیا ہے۔پولیس کے مطابق ٹرک ڈرائیور سے مسلسل پوچھ گچھ کی جا رہی ہے۔پولیس یہ پتہ لگانے کی کوشش کر رہی ہے کہ کیا یہ دھماکہ خیز مواد ضلع میں واقع پتھر کی کان کے لئے لے جا رہے تھے یا پھر اسے لانے کے پیچھے کوئی اور مقصد تھا۔