منگلورو ایئر پورٹ پر مشتبہ دھماکو مادہ والی بیگ دستیاب ہونے کے بعد ضلع شمالی کینرا کے کائیگااٹامک پلانٹ اور سی برڈ بحری اڈے پر چوکسی
تفتیش میں ناکامی کوچھپانے کے لئے معاملے کو دیا جاسکتا ہے دوسرا رخ۔ سابق وزیر اعلیٰ کمارا سوامی کا خدشہ
منگلورو21/جنوری (ایس او نیوز)بجپے انٹر نیشنل ہوائی اڈے پر ایک لاوارث بیگ میں مشتبہ دھماکہ خیز مادہ بر آمد ہونے کے بعد ضلع شمالی کینرا کے کائیگا اٹامک اینرجی پلانٹ اور سی برڈ نیول بیس، فوجی ہتھیار کے ذخیرے والے ’وجرا کوش‘ اور مختلف ڈیم جیسے حساس مقامات کے باہر اور اندر چوکسی بہت زیادہ بڑھادی گئی ہے۔ اس کے علاوہ ضلع کے 162کلو میٹر طویل ساحلی علاقے میں سمندری سطح پر بھی نگرانی تیز کردی گئی ہے۔
بتایا جاتا ہے کہ منگلورو ایئر پورٹ پر جو لاوارث بیگ ملی تھا وہ عام طورلیپ ٹاپ رکھنے والی بیگ ہے۔ اس میں تقریباً دو کلو وزنی ایک ٹفن باکس کی شکل میں بم جیسی چیز رکھی ہوئی تھی۔اسی میں مشتبہ دھماکہ خیزسفوف، کچھ ٹوٹے ہوئے تار کے ٹکڑے، کچھ الیکٹرانکس اشیاء،ایک الگ سے رکھا ہوا ٹائمررکھا ہوا تھا۔ جسے بعد میں بم اسکواڈ نے ہوائی اڈے سے دورکینجار کے ویران علاقے میں لے جاکر ناکارہ بنادیا۔سی سی ٹی وی کیمرے میں جو تصویر قید ہوئی ہے اسی کو مشتبہ ملزم مانتے ہوئے اس کا فوٹیج جاری کردیا ہے اورپولیس نے عوام سے اپیل کی ہے کہ تصویر میں نظر آنے والا یہ شخص جہاں کہیں نظر آئے اس کی خبر فوری طور پر پولیس کو دی جائے۔اس کے علاوہ پولیس نے عوام سے یہ بھی اپیل کی ہے کہ کہیں بھی کوئی مشکوک چیز پڑی ہوئی نظر آتی ہے تو فوری طور پر قریبی پولیس اسٹیشن کو اس کی خبر دی جائے۔
منگلورو ایئر پورٹ پر مشکوک بم بر آمد ہونے کے بعد منگلورو کے علاوہ بنگلورو، ہبلی، بیلگاوی اور دیگر شہروں کے ہوائی اڈوں، بس اسٹانڈس اور ریلوے اسٹیشنوں پر نگرانی اور چوکسی بڑھا دی گئی ہے۔ضلع اڈپی کے مختلف حساس مقامات پر چوکسی بڑھا دی گئی ہے اورملپے ساحل، ریلوے اسٹیشن، اڈپی بندرگاہ، بس اسٹانڈجیسے کئی جگہ عوامی مقامات پر تلاشیاں بھی لی گئی ہیں۔بعض مقامات پر ڈاگ اسکواڈ، اور بم تلاش کرنے کے آلات کا بھی سہارالیا گیا۔
کمارا سوامی نے حکومت پرلگایا بڑا الزام: اس دوران ریاستی وزیر داخلہ بسواراج بومائی نے کہا کہ اس معاملے کی جانچ کے احکامات جاری کردئے گئے ہیں۔دوسری طرف سابق وزیر اعلیٰ کمارا سوامی نے کہا ہے کہ مشکوک بم بر آمد ہونے سے متعلق تحقیقات سرعت کے ساتھ کی جائے اور اسے جلد مکمل کرلینا چاہیے۔اس میں تاخیر ہونے پر پولیس کی طرف سے کوئی اور ہی کہانی گھڑ لینے کے امکانا ت موجود ہیں۔شرینگیری میں پریس والوں سے بات کرتے ہوئے انہوں نے کہا کہ ہوائی اڈے پر سی سی ٹی وی کیمرے لگے ہوئے ہیں۔ کس نے یہ کام انجام دیا ہے یہ معلوم کرنا کوئی مشکل بات نہیں ہے۔تحقیقات کے لئے پندرہ دن، بیس دن اور مہینہ کی مہلت دینے سے تحقیقات میں تاخیر ہوگی اور پولیس اس معاملے کو کسی اور کہانی سے جوڑکرپیش کرے گی۔اس لئے حکومت اورپولیس کو چاہیے کہ اس واقعے کے حقائق کو جلد ازجلد عوام کے سامنے لائے۔
کمارا سوامی نے واضح الفاظ میں کہا کہ حالیہ چند واقعات کے پس منظر میں موجودہ ریاستی حکومت پر مجھے شکوک و شبہات ہیں۔ حکومت اور پولیس والے مل کر کچھ ایسی کوشش کرتے دکھائی دے رہے ہیں کہ عوام اور پولیس کے درمیان تصادم ہوجائے۔خود حکومت کچھ افسران کو سامنے رکھتے ہوئے عوام کے اندر پولیس کے ساتھ تصادم کے مواقع پیدا کررہی ہے۔ اگر بم بر آمد ہونے کی تحقیقات میں تاخیر کی جاتی ہے تو پھر ایک نیا تصادم پیدا ہونے کے امکانات ہیں۔