کائیگا جوہری توانائی پلانٹ کی توسیع۔ سرسی میں سوورناولّی مٹھ کے سوامی نے کی وزیر داخلہ امت شاہ سے ملاقات
سرسی 19/جنوری (ایس او نیوز) کاروار میں واقع کائیگا جوہری توانائی پلانٹ کی توسیع کا جو منصوبہ مرکزی حکومت نے بنایا ہے اس کے منفی اثرات کی وجہ سے عوام کے اندرشدید مخالفت پائی جاتی ہے۔
وزیر داخلہ امت شاہ کے ہبلی دورے سے فائدہ اٹھاتے ہوئے اس موضوع پر عوام کے جذبا ت اور خدشات سے آگاہی دینے کے لئے سوندا سوورنا ولّی مٹھ کے شری گنگا دھر سرسوتی سوامی جی نے امت شاہ سے ملاقات کی۔انہوں نے امت شاہ کے سامنے یہ بات رکھی کہ کائیگا پلانٹ شروع کیے جانے کے بعد سے کاروار اوراس کے اطراف میں کینسراور دیگر پیچیدہ قسم کی بیماریاں عام ہوگئی ہیں۔مرکزی حکومت کو چاہیے اس نقطہ نظر سے صحت عامہ کا سروے کرائے۔اور انہی اسباب کو سامنے رکھتے ہوئے اب کائیگا پلانٹ کے لئے پانچویں اور چھٹویں یونٹ کے تعمیری منصوبے کو روک دینا چاہیے۔
معلوم ہوا ہے کہ سوامی جی کی باتیں سننے کے بعد امت شاہ نے کہا ہے کہ اس سے قبل ممبئی کے ٹاٹا انسٹی ٹیوٹ کی طرف سے کیے گئے سروے کی رپورٹ اور تجاویز منگواکر اس کاجائزہ لیا جائے گا جس کے بعد سوورناولّی مٹھ کی قیادت میں ایک وفد کو دہلی میں مدعو کرکے اس موضوع پر بات چیت کی جائے گی۔
اس موقع پر سوندا سوادی جین مٹھ کے شری بھٹاکلنکا سوامی جی، رکن پارلیمان پرہلاد جوشی، نلین کمارکٹیل،ریاستی بایو ڈائیورسٹی بورڈ کے صدر اننت ہیگڈے اشیسراور رکن اسمبلی روپالی نائک کے علاوہ وی ایس پاٹل، گرو پرساد پھائدے اور شانتارام باندیکر، وی این ہیگڈے اور نارائن ہیگڈے وغیرہ موجود تھے۔