نئی دہلی7/مئی (یو این آئی)  مرکزی حکومت نے پٹرول پر ایکسائز ڈیوٹی میں 10 روپے اور ڈیزل پر 13 روپے فی لیٹر اضافہ کیا ہے۔مودی حکومت نے منگل کی دیر رات کو یہ اعلان کیا۔ یہ فیصلہ بدھ سے نافذ العمل ہوگا۔حالانکہ دونوں ایندھن پر ایکسائز ڈیوٹی بڑھانے سے پٹرول اور ڈیزل کی قیمتوں پر کوئی فرق نہیں پڑے گا۔

عالمی وبا کووِڈ-19 کے سبب تیل کی تیل کی پیداوار کرنے والے ممالک سے ڈیمانڈ (مانگ) کم ہو جانے کے سبب خام تیل کی قیمیتں تاریخ کی سب سے نچلی سطح پر ہیں۔

فی الحال ملک میں پٹرول پر ایکسائز ڈیوٹی 22.98 روپے فی لیٹر ہے جبکہ ڈیزل پر ایکسائز ڈیوٹی 18.83 روپے فی لیٹر ہے۔

واضح رہے حکومت کے اس فیصلہ کے بعد اس بات کے امکان ختم ہو گئے ہیں کہ عالمی منڈی میں خام تیل کی قیمتوں میں کمی کا فائدہ ہندوستانی عوام کو منتقل ہو جائے گا۔ اس سے پہلے کل دہلی میں پیٹرول اور ڈیزل پرویٹ بڑھا دیا تھا جس کے بعد دہلی میں ڈیزل کی قیمتوں میں سات روپے سےزیادہ کا اضافہ ہو ا تھا جبکہ پیٹرول کی قیمتوں میں تین روپے سے زیادہ کا اضافہ ہوا تھا۔

ویٹ بڑھانے کے تعلق سے دہلی کی حکومت نے کہا تھا کہ کیونکہ ٹیکس کیلکشن کم ہوا ہے اس لئے ریاست کا خزانہ خالی ہے ۔ عام آدمی پارٹی کے رہنما ؤں نے اس اضافہ کو جائزقرار دیا تھا جبکہ حزب اختلاف نے کہا تھا کہ ڈیزل کی قیمتوں میں اضافہ کے بعد ضروری استعمال کی چیزوں کی قیمتوں میں بھی اضافہ ہو گا اور کورونا کے اس بحران کے دوران عام آدمی کو مہنگائی کی مار جھیلنی پڑے گی ۔