کالج کی تعلیم کے بعد حافظ قرآن بننے کی عمدہ مثال؛ 180 دنوں میں شیرور کے نوجوان نے مکمل کیا حفظ قران
بھٹکل 22؍جولائی (ایس او نیوز) پڑوسی علاقہ شیرور کے محمد ابراہیم ابن عبدالواحد صدیقی نے پی یو سی کالج کی تعلیم حاصل کرنے کے بعد محض180 تعلیمی دنوں کے اندر جامعہ دارالسنہ شیرور کرناٹک سے حفظ قرآن مکمل کرنے کا شرف حاصل کرلیا ہے ، اس کے ساتھ ہی یہ بات پھر ایک بار ثابت ہوگئی ہے کہ قرآن کریم اللہ تعالیٰ کی نازل کردہ ایسی کتاب ہدایت ومعجزہ الٰہی ہے جس کو کسی بھی عمر میں اور کسی بھی تعلیم سے آراستہ ہونے کے بعد بھی حفظ کیا جاسکتا ہے۔
مدرسہ جامعہ دارالسنہ کی طرف سے دی گئی اطلاع کے مطابق شعبہ حفظ جامعہ دارالسنہ کا ایک اہم تعلیمی شعبہ ہے جس میں شیرور، اطراف واکناف اور مختلف علاقوں کے طلبہ زیر تعلیم ہیں۔ یہاں لاک ڈاؤن کی مدت میں بھی بذریعہ فون حفظ قرآن کی تعلیم جاری ہے اور اس کے مثبت نتائج بھی سامنے آرہے ہیں۔
نوجوان ابراہیم کے حفظ مکمل کرنے پرمدرسہ کے اساتذہ سمیت شیرور کے کئی ایک ذمہ داران نے نوجوان کو دعائیں دی ہیں اور جامعہ کو ترقی کی منازل طئے کرنے اور اس کے ذریعہ امت مسلمہ کو فائدہ پہنچانے کی دعاوں اور نیک خواہشات کا اظہار کیا ہے۔